Mga Milagro sa Pagpanglakaton ni Pablo Pa-Roma

Ginhambalan sang Espiritu si Pablo nga magkadto sa Jerusalem. Madamo nga tawo didto ang indi nanamian sang ginpanudlo ni Pablo parte kay Jesucristo. Gindakop sia nila kag ginhigtan sang kadena. Ginsugid ni Pablo sa tanan ang parte sa tion nga nakakita sia sang kasanag halin sa langit, nabatian ang tingug ni Jesus, kag sang ginbunyagan sia.

Mga Binuhatan 21:4, 12–13, 27–40; 22:1–16

Si Pablo ginpriso. Samtang ato sia didto, nagpakita si Jesus kag nagsiling, “Magpakaisog ka, Pablo.” Siling Niya nga si Pablo magapamatuod parte sa Iya sa Roma.

Mga Binuhatan 23:10–11

Si Pablo gindala sa atubangan sang mga gobernador kag sing isa ka hari. Maisog sia nga nagpamatuod parte kay Jesucristo sa sining gamhanan nga mga tagdumala. Gusto niya nga ang tanan nga tawo magpati kay Jesus.

Mga Binuhatan 24:10–27; 25:6–8, 17–19; 26:1–29

Ginpadala sang hari si Pablo sa Roma agud hukman ni Cesar, ang emperador. Si Pablo nagsakay sa barko upod sa iban pa nga mga priso, kag nagdungka sa lainlain nga lugar. Sa isa ka pagdungka, nahibal-an ni Pablo nga sa indi madugay magaabot na ang tigtulugnaw. Kon magpadayon sila, mabutang sila sa dako nga peligro. Ginhambalan niya ang mga tripulante sang barko nga maghulat tubtob nga mag-ayo ang panahon.

Mga Binuhatan 27:1–10

Wala sing may nagpati kay Pablo, gani nagpadayon sila sa pagpanakayon. Nag-abot ang mabaskog nga bagyo, kag ang barko ginhampas sang mga balod sa sulod sing pila ka adlaw. Indi nila makita ang adlaw ukon ang mga bituon. Abi nila mapatay na sila sa bagyo.

Mga Binuhatan 27:11–20

Isa ka gab-i, ang anghel sang Dios nagbisita kay Pablo kag nagsiling, “Indi ka magkahadlok, Pablo.” Ang anghel nagsiling nga makalab-ot si Pablo sa Roma, suno sa ginpromisa sang Ginuo. Nagsiling sia nga protektahan sang Dios ang tanan nga ara sa barko—wala sing isa sa ila ang mapatay.

Mga Binuhatan 27:23–24

Ginsugiran ni Pablo ang tanan parte sa ginhambal sang anghel. “Magkalipay kamo,” siling ni Pablo, “kay nagatuo ako sa Dios.”

Mga Binuhatan 27:21–25

Pagligad sing pila ka adlaw, naaksidente kag naglugdang ang barko. Pero pareho sang ginpromisa sang anghel, wala sing may napatay sa barko. Tanan sila naglangoy pakadto sa isla nga ginatawag Malta.

Mga Binuhatan 27:40–44; 28:1

Ang mga tawo nga nagaestar sa Malta nangin maayo kay Pablo kag sa iban pa nga halin sa barko. Nagdabok sila sing kalayo agud makapainit-init ang tanan.

Mga Binuhatan 28:2

Gulpi lang, may man-og nga naggwa sa kalayo kag ginkagat ang kamot ni Pablo. Pero wala maano si Pablo. Ginwaslik lang niya ang man-og. Natingala ang mga tawo!

Mga Binuhatan 28:3–6

Ginpadayon si Pablo sang isa ka tawo nga ginhingalan Publio sa iya balay. Ang amay ni Publio nagamasakit sing malubha. Gintungtong ni Pablo ang iya mga kamot sa iya kag gingamit ang gahum sang Dios sa pag-ayo sa iya.

Mga Binuhatan 28:7–8

Nagtiner si Pablo sing tatlo ka bulan sa Malta. Ginbuligan sia sang Ginuo sa paghimo sing madamo nga mga milagro, nga nagabendisyon kag nagapang-ayo sang mga tawo nga nagamasakit. Dayon, pareho sang ginsaad sang Ginuo, nagpanglakaton si Pablo pa-Roma.

Mga Binuhatan 28:9–16

Si Pablo isa pa ka priso sang didto sia sa Roma. Pero gintugotan sang iya mga guardia ang mga tawo nga bisitahon sia. Si Pablo nagtudlo parte kay Jesucristo sa bisan sin-o nga luyag magpamati. Nagsulat man sia sa mga miyembro sang Simbahan sa madamo nga mga lugar. Ang iban sini nga mga sulat ara sa Bag-ong Katipan.

Mga Binuhatan 28:16–31