Kay Cristo ang Tanan Buhion

Pila sang mga miyembro sang Simbahan sa isa ka siyudad nga ginatawag nga Corinto may mga pamangkot kon ano ang matabo pagkatapos nga kita mapatay. Indi sila sigurado kon bala si Jesus nabanhaw gid matuod. Pila sang mga tawo nagsiling nga wala sing pagkabanhaw. Nabatian ni Pablo ang parte sini kag nagsulat sa mga Santos sa Corinto.

1 Mga Taga-Corinto 15:12–14

Ginsulat ni Pablo nga ang Pagkabanhaw ni Jesucristo importante nga parte sang Iya ebanghelyo. “Si Cristo napatay tungod sa aton mga sala,” siling ni Pablo, kag “ginbanhaw Sia sa ika-tatlo nga adlaw.” Masobra sa 500 ka tawo ang nakakita sa Iya pagkatapos Niya nga mabanhaw, dala si Pablo kag ang iban pa nga mga Apostoles.

1 Mga Taga-Corinto 15:1–8

Gintudlo ni Pablo nga kon si Cristo wala nabanhaw, kita tanan mangin masubo kag wala sing paglaum. Tungod sang Pagkahulog sa Sala ni Adan, kita tanan mapatay, pero tungod kay Jesucristo, kita tanan mabanhaw man!

1 Mga Taga-Corinto 15:17–22

Ginpadumdom ni Pablo ang mga Santos sa Corinto nga ang mga tawo ginabunyagan na sang una para sa mga minatay. Ngaa kinahanglan naton ina himuon kon ang mga tawo nga napatay indi na gid man mabanhaw? Ginabunyagan kita para sa mga patay kay nahibal-an naton nga ang tanan mabuhi liwat. Ini nagahatag sa ila sang kahigayunan nga makabaton sang mga bugay sang Ginuo.

1 Mga Taga-Corinto 15:29

Ang iban nga mga Santos sa Corinto naghunahuna kon ano ayhan ang hitsura sang aton mga lawas kon nabanhaw kita. Siling ni Pablo nga aton mga lawas mangin mahimayaon. Indi na ini magluya ukon magmasakit ukon magtigulang. Ang iban nga mga tawo makaangkon sang selestiyal nga mga lawas, nga masanag pareho sang adlaw. Ang iban mangin masanag pareho sang bulan, kag ang iban mangin masanag pareho sang mga bituon.

1 Mga Taga-Corinto 15:35, 40–43; Doktrina kag mga Kasugtanan 76:96–98; 88:20–23