Ginbanhaw ni Jesus si Lazaro

Sanday Maria, Marta, kag Lazaro nagapuyo sa banwa nga ginatawag Betania. Nagapati sila kay Jesus, kag palangga Niya sila. Si Maria kag Marta mga utod ni Lazaro.

Juan 11:1, 5

Si Lazaro nagmasakit sing grabe. Si Jesus ato sa lain nga banwa. Ginpahibalo Sia ni Maria kag Marta nga nagamasakit ang Iya abyan.

Juan 11:1–3

Naghulat si Jesus sang duha ka adlaw. Dayon ginhambalan Niya ang Iya mga disipulo nga malakat sila sa Betania. Nabalaka ang mga disipulo kay may mga tawo malapit sa Betania nga gusto sakiton si Jesus. Pero gusto ni Jesus nga buligan si Lazaro. Nagsiling si Jesus nga si Lazaro napatay na, kag banhawon Niya Sia.

Juan 11:6–16

Ginsugat ni Marta si Jesus sa gwa sang banwa. Siling niya nga kon nag-abot si Jesus sing temprano, wala kuntani mapatay si Lazaro. Nagpromisa si Jesus nga mabuhi liwat si Lazaro.

Juan 11:17–24

Siling ni Jesus, “Ako amo ang pagkabanhaw kag ang kabuhi.” Ginpamangkot Niya si Marta kon bala nagapati sia sa Iya. Nagsiling sia, “Nagatuo ako nga ikaw ang Cristo, ang Anak sang Dios.”

Juan 11:25–27

Nagbalik si Marta sa balay kag ginsugiran si Maria nga si Jesus nag-abot. Nagpalapit si Maria kag nagluhod sa tiilan ni Jesus, nga nagahibi tungod sa iya utod. Naghibi man si Jesus. Palangga Niya si Lazaro, Maria, kag Marta.

Juan 11:28–36

Sanday Jesus, Marta, Maria, kag iban pa nagkadto sa kuweba kon diin ginlubong si Lazaro. Isa ka dako nga bato ang nagatabon sa puwertahan. Nagsiling si Jesus nga isdugon ang bato.

Juan 11:38–39

Pero ginhambalan ni Marta si Jesus nga si Lazaro apat na ka adlaw nga napatay. Ginpadumdon ni Jesus si Marta parte sa Iya promisa. Ginpangabay Niya sia nga magtuo.

Juan 11:39–40

Dayon nangamuyo si Jesus sa Iya Amay. Nagpasalamat Sia sa Dios sa pagpamati pirme sa Iya. Gusto ni Jesus nga magpati ang mga tawo nga ginpadala Sia sang Dios nga mangin Manluluwas. Dayon nagsinggit si Jesus, “Lazaro, gwa ka.”

Juan 11:41–43

Si Lazaro naggwa sa kuweba. Naputos pa sia gihapon sa mga panapton kag mga habol sang paglubong sa iya. Ginsilingan ni Jesus ang mga tawo nga kakasan sia sang putos. Madamo sang mga tawo nga naglantaw sadto nga adlaw karon nagapati na nga si Jesus matuod ang Manluluwas, ang Anak sang Dios.

Juan 11:44–45