Nagatudlo si Jesus sang Wali sa Bukid

Nagkadto si Jesus kag ang Iya mga disipulo sa bukid malapit sa Dagat sang Galilea. Gintudloan sila ni Jesus kon paano kita mangin malipayon kag mangin mas pareho sa aton Amay nga Langitnon.

Mateo 5:1–2

Gintudlo ni Jesus nga ginabugayan kag mangin malipayon ang mga tawo kon sila mapainubuson, matinlo sang tagipusuon, kag nagatinguha nga himuon ang husto. Ang mga tawo nga nagapatawad sa iban mapatawad man. Ang mga tawo nga nagapakighidaet tawgon nga mga anak sang Dios.

Mateo 5:3–9

Siling ni Jesus nga ang Iya mga disipulo kasanag sang kalibutan—pareho sang siyudad sa ibabaw sang bungyod nga makita sang tanan. Indi naton dapat taguon ang aton kasanag.

Mateo 5:14

Kon sundon naton si Jesus, daw pareho kita sang kandila nga nagahatag sang kasanag sa tanan nga ara sa kuwarto. Ang maayo naton nga mga binuhatan makabulig sa mga tawo nga magpati sa Amay nga Langitnon.

Mateo 5:15–16

Siling ni Jesus nga dapat naton palanggaon ang tanan—bisan ang mga tawo nga wala nagapalangga sa aton. Dapat naton sila ipangamuyo. Nagtudlo si Jesus nga dapat naton tinguhaan nga mangin pareho sa aton Amay nga Langitnon. Gintudlo Niya nga kon magbulig kita sa mga tawo, indi naton kinahanglan ihambal sa tanan ang aton ginhimo. Nakita sang Dios ang maayo naton nga ginahimo, kag bugayan Niya kita.

Mateo 5:38–48; Mateo 6:1–4

Kon magpangamuyo kita, indi naton dapat paligban ang ginapamensar sang iban nga tawo parte sa aton. Indi naton dapat pagsulit-suliton ang aton mga ginahambal sa pangamuyo kon indi kita sinsero. Dapat kita magpangamuyo halin sa aton mga tagipusuon. Ginapamatian sang aton Amay nga Langitnon ang aton mga pangamuyo kag kabalo Sia kon ano ang aton kinahanglan. Bisan indi kita mabatian sang iban, mabatian Niya kita.

Mateo 6:5–8

Nagtudlo si Jesus nga indi kita dapat mamensar nga mas maayo kita sangsa iban nga mga tawo. Dapat naton panumdumon nga tanan kita may mga kabudlayan. Imbes nga husgaran ang iban, dapat naton pamensaron kon paano kita mangin mas maayo. Dapat naton tratuhon ang iban sa paagi nga gusto naton nga tratuhon kita.

Mateo 7:1–5, 12

Dayon nag-istorya si Jesus parte sa buangbuang nga tawo nga nagpatindog sang iya balay sa balas kag sa maalam nga tawo nga nagpatindog sang iya balay sa bato. Sang mag-abot ang mabunok nga ulan, natumba ang balay sa balas, kag ang balay sa bato nagpabilin nga nagatindog. Siling ni Jesus nga kon magpamati kita sa Iya mga pinanudlo kag sundon naton ini, mangin pareho kita sa maalam nga tawo.

Mateo 7:24–28