Paglakat sa Tubig

Ang pagtuo nagadaog sang kahadlok

Si Jesus nga nagatulok sa baruto sa Dagat sang Galilea.

Gusto ni Jesus nga mag-isahanon para magpangamuyo. Ginpalakat Niya ang Iya mga disipulo sa baruto patabok sa pihak nga parte sang Dagat sang Galilea. Naglakat si Jesus para magpangamuyo sa bukid.

Mateo 14:22–23

Ang mga Apostoles nga gin-abtan sang bagyo.

Sina nga gab-i, mabaskog ang hangin, kag kadalagko sang mga balod. Nagpangabudlay todo bilog nga gab-i ang mga disipulo ni Jesus para mapadungka ang baruto sa tabok sang dagat.

Mateo 14:24–25

Nakita sang mga Apostoles si Jesus nga nagalakat pakadto sa ila sa ibabaw sang tubig.

Sang halos maglipas na ang bilog nga gab-i, may nakita ang mga disipulo nga nagalakat palapit sa ila sa ibabaw sang tubig. Abi nila bagat, kag hinadlukan sila. Indi ato bagat; si Jesus ato! Gintawag sila ni Jesus, “Magpakaisog kamo! Ako ini. Indi kamo magkahadlok!”

Mateo 14:25–27

Ginhagad ni Jesus si Pedro nga magpalapit sa Iya sa ibabaw sang tubig.

Ginpangabay ni Pedro si Jesus nga hagaron sia nga magkadto sa Iya sa ibabaw sang tubig. Siling ni Jesus, “Dali diri!” Naggwa si Pedro sa baruto kag nagsugod nga maglakat sa tubig, pareho kay Jesus!

Mateo 14:28–29

Ginkulbaan si Pedro kag nagsugod sia sa paglugdang.

Pero sang makita ni Pedro ang mabaskog nga hangin kag ang dalagko nga mga balod, hinadlukan sia. Nagsugod sia nga maglugdang sa tubig. Nagsinggit sia kay Jesus, “Ginuo, tabangi ako.”

Mateo 14:30

Naglab-ot si Jesus kag gindakop si Pedro. Ginpamangkot niya si Pedro kon ngaa nagduhaduha sia imbes nga mas magsalig sa Iya.

Mateo 14:31

Nagsakay balik si Jesus kag Pedro sa baruto.

Sang makasakay na si Jesus kag Pedro sa baruto, nag-untat ang hangin. Nahalawhaw ang mga disipulo sa natabo. Nahibal-an nila nga si Jesus matuod gid nga Anak sang Dios, kag ginsimba nila Sia.

Mateo 14:32–33