Ginapaumpawan ni Jesus ang Duha ka Disipulo

Sang adlaw nga nabanhaw si Jesus, duha ka disipulo ang nagalakat halin sa Jerusalem pakadto sa banwa nga ginatawag Emaus. Mga sumulunod sila ni Jesus, kag ginasuboan sila. Nagaistoryahanay sila parte sa kamatayon ni Jesus kag sang iban nga mga butang nga natabo sang nagliligad lang nga mga adlaw.

Lucas 24:13–14

Samtang nagalakat sila, nag-abot si Jesus kag naglakat upod sa ila, pero wala sila kabalo nga si Jesus ato. Namangkot Sia kon ano ang ila ginaistoryahan kag kon ngaa masubo sila.

Lucas 24:15–17

Nakibot sila nga wala Sia makabalo sang natabo. Ginsugiran nila Sia parte kay Jesus. Abi nila nga Sia ang ila mangin Manluluwas, pero napatay Sia.

Lucas 24:18–21

Ginsiling man nila nga may nagkadto nga mga babayi sa Iya lulubngan, pero wala na didto ang lawas ni Jesus. Ginhambalan sang mga anghel ang mga babayi nga buhi si Jesus.

Lucas 24:21–24

Gintudloan dayon sila ni Jesus kon ano ang ginahambal sang balaan nga kasulatan parte sa Manluluwas. Ginsiling Niya nga ang mga propeta nagtudlo nga ang Manluluwas mapatay kag magabangon liwat.

Lucas 24:25–27

Sang mag-abot sila sa Emaus, malapit na lang maggab-i. Gin-imbitar sang duha ka disipulo si Jesus nga magpabilin upod sa ila. Nagpungko si Jesus para magkaon upod sa ila. Nagkuha Sia sang tinapay, ginbendisyonan ini, kag ginhatag sa mga disipulo. Sa sina nga tion, nakilal-an nila si Jesus. Gulpi Sia nga nadula.

Lucas 24:29–31

Gin-istoryahan sang duha ka disipulo ang manami nga balatyagon nga ila nabatyagan sa ila tagipusuon samtang ginatudloan sila ni Jesus halin sa balaan nga kasulatan. Dali-dali sila nga nagbalik sa Jerusalem para isugid sa iban pa nga mga disipulo nga nakita nila si Jesus.

Lucas 24:32–35