Nagapamatuod si Jesus sang Iya Misyon

Nagkadto si Jesus sa Nazaret, kon diin nagaestar ang Iya pamilya kag mga abyan. Amo ini ang lugar nga Iya gindak-an. Sang Adlaw nga Inugpahuway, nagkadto Sia sa sinagoga, kon diin nagakadto ang mga tawo para magtuon sang balaan nga kasulatan kag magsimba sa Dios.

Lucas 4:16–17

Sa sinagoga, nagtindog si Jesus kag nagbasa sang balaan nga kasulatan halin kay propetang Isaias. Siling sang balaan nga kasulatan nga pila ka adlaw magaabot ang Manluluwas. Magawali Sia sang ebanghelyo sa mga imol kag sa mga nasakit ang balatyagon. Buligan niya ang mga bulag kag ang mga nasakitan.

Isaias 61:1–2; Lucas 4:17–19

Nagtapos si Jesus sa pagbasa kag nagpungko. Gintulok Sia sang tanan. Ginhambalan Niya sila nga sina mismo nga adlaw, ang balaan nga kasulatan nga Iya ginbasa matuman. Sia ang Manluluwas.

Lucas 4:21

Nakibot gid ang mga tawo sang Nazaret sa ginhambal ni Jesus. Paano si Jesus nangin Manluluwas? Abi nila anak lang Sia ni Maria kag Jose, indi Anak sang Dios. Para sa ila, daw regular lang Sia nga tawo.

Lucas 4:22

Kabalo si Jesus nga gusto sang mga tawo nga maghimo Sia sang isa ka milagro para pamatud-an nga Sia ang Manluluwas. Gintudlo Niya nga ang mga milagro para sa mga tawo nga nagapati, kag kon kaisa nagahimo ang Dios sang mga milagro para sa mga tawo nga indi taga-Israel tungod mas may pagtuo sila. Ang iban nga mga tawo sa sinagoga nangakig kay Jesus.

Lucas 4:23–28

Ginpagwa Sia nila sa siyudad kag gindala sa ibabaw sang bungyod. Gusto nila nga itiklod Sia halin sa bungyod.

Lucas 4:28–29

Pero nakapalagyo si Jesus sa akig nga mga tawo.

Lucas 4:30

Tungod indi sila gusto nga didto Sia sa Nazaret, naglakat si Jesus sa lain nga siyudad para magtudlo.

Lucas 4:31–32