Ginpakaon ni Jesus ang Linibo ka Tawo

Sia ang Tinapay sang Kabuhi

Si Jesus nga nagapakalinong nga isahanon.

Natukiban ni Jesus nga ginpatay si Juan Bautista. Naglakat Sia sa lugar nga malayo sa mga banwa para magpakalinong nga isahanon.

Mateo 14:13

Si Jesus nga nagapakighambal sa grupo sang mga tawo.

Sang mabalitaan sang mga tawo kon diin si Jesus nagkadto, ginsundan Sia nila. Nakita sila ni Jesus, kag nakabatyag Sia sang pagpalangga sa ila. Bilog nga adlaw Niya sila nga ginbendisyunan kag ginpang-ayo.

Mateo 14:13–14

Ginapangabay ni Jesus ang mga Apostoles nga hatagan ang mga tawo sang makaon.

Sang hapon na, ginagutom na ang mga tawo. Abi sang mga Apostoles nga papaulion ni Jesus ang mga tawo sa ila mga banwa para magkuha sang pagkaon. Pero gusto ni Jesus nga magtiner lang sila. Ginapangabay niya ang mga Apostoles nga hatagan ang mga tawo sang makaon.

Mateo 14:15–16

Nakakita si Andres sang bata nga lalaki nga may diutay nga pagkaon.

Nakakita si Apostoles Andres sang bata nga lalaki nga may lima kabilog nga tinapay kag duha ka gamay nga isda para ihatag sa mga tawo. Pero may masobra 5,000 ka lalaki, pati mga babayi kag kabataan, nga kinahanglan magkaon. Paano nila mapakaon ang amo sini kadamo nga tawo nga kadiutay lang nga pagkaon?

Mateo 14:17, 21; Juan 6:8–10

Si Jesus nga nagapangamuyo kag nagabendisyon sang pagkaon.

Ginapangabay ni Jesus ang mga Apostoles nga dalhon sa Iya ang pagkaon. Ginhambalan Niya ang mga tawo nga magpungko sa hilamon. Dayon nagpangamuyo si Jesus para magpasalamat sa Amay nga Langitnon sa tinapay kag isda kag ginbendisyunan ini. Dayon ginsipad-sipad Niya ang tinapay kag isda.

Mateo 14:18–19; Juan 6:10–11

Ginhatag sang mga Apostoles ang pagkaon sa mga tawo.

Ginsugo ni Jesus ang Iya mga Apostoles nga ihatag ang tinapay kag isda sa mga tawo. Ang tanan nakakaon, kag ang tanan nabusog. Pagkatapos nila nga magkaon, may 12 pa ka basket nga puno sang nabilin nga pagkaon!

Mateo 14:20; Juan 6:11–13

Nagbinalik ang mga tawo, nga nagapangita sang dugang nga pagkaon.

Pagkadason nga adlaw, nagbinalik ang mga tawo kag nakita nila liwat si Jesus. Pero kabalo si Jesus nga kadam-an sa ila nagasunod lamang sa Iya tungod ginhatagan Niya sila sang pagkaon. Ginpadumdom sila ni Jesus nga ang pagkaon nagadugay lang sa malip-ot nga panahon. May mas maayo Sia nga ihatag sa ila.

Juan 6:14, 24–27

Si Jesus nagatudlo nga Sia ang Tinapay sang Kabuhi.

Siling ni Jesus, “Ako amo ang tinapay sang kabuhi.” Ang tinapay nagahatag sa aton sang kabuhi sa duta. Pero si Jesucristo makahatag sa aton sang wala katapusan nga kabuhi upod sa aton Amay nga Langitnon.

Juan 6:35–58

Nangakig ang mga tawo tungod sa mga pinanudlo ni Jesus.

Madamo nga tawo ang wala manamian sang ginatudlo ni Jesus. Naglakat sila kag nagdesisyon nga indi na magsunod kay Jesus.

Juan 6:60, 66

Ginhambal ni Pedro kay Jesus nga ang mga Apostoles indi magbiya sa Iya.

Dayon naghambal si Jesus sa Iya mga Apostoles, “Kamo man bala luyag magbiya sa akon?” Sabat ni Pedro, “Ginuo, kay sin-o bala kami makadto? Yara sa imo ang mga pulong nga nagahatag sang kabuhi nga dayon.” Wala maghalin ang mga Apostoles. Kabalo sila nga si Jesucristo amo ang Manluluwas kag Anak sang Dios.

Juan 6:67–69