Nadula nga Carnero, Nadula nga Sinsilyo, kag Nadula nga Anak

Pila sa mga lider nga Judio ang nakakita kay Jesus nga nagapakigsugilanon kag nagakaon upod sa mga tawo nga sa hunahuna nila mga makasasala. Naghunahuna ang mga lider nga sala para kay Jesus ang mag-upod kaon sa mga makasasala. Ginsugiran ni Jesus ang mga lider sang tatlo ka istorya ukon mga paanggid agud mabuligan sila nga maintiendihan nga gusto Niya buligan ang kada isa nga maghinulsol kag malipayon Sia kon himuon nila ini.

Lucas 15:1–3

Ang una nga paanggid parte sa tawo nga may 100 ka carnero. Isa sang iya mga carnero nadula.

Lucas 15:4

Ginbayaan sang tawo ang 99 ka carnero kag ginpangita ang isa nga nadula. Nagpadayon sia sa pagpangita tubtob nga nakita niya ini.

Lucas 15:4

Sang nakita niya sang ulihi ang iya nadula nga karnero, nalipay gid sia! Ginpas-an niya ang carnero pauli kag ginhambalan ang iya mga abyan kag mga kasilingan nga magkinasadya upod sa iya. Siling ni Jesus amo ini ang nagakabatyagan sang Amay nga Langitnon kon may nagahinulsol sang ila mga sala kag nagabalik sa Iya.

Lucas 15:5–7

Ang ikaduha nga paanggid parte sa babayi nga may 10 ka sinsilyo nga pilak. Sang madula ang isa, nagsindi sia sang kandila kag nanilhig sa ila balay, nga ginapangita ang nadula nga sinsilyo. Padayon sia nga nagpangita hasta nga nakita niya ini.

Lucas 15:8

Sang nakita niya sang ulihi ang iya nadula nga sinsilyo, nalipay sia kaayo! Ginhambalan niya ang iya mga abyan kag kasilingan nga magpangalipay upod sa iya. Siling ni Jesus amo ini ang nagakabatyagan sang mga anghel sa langit kon may nagahinulsol sang ila mga sala.

Lucas 15:9–10

Ang ikatatlo nga paanggid parte sa tawo nga may duha ka anak nga lalaki. Ang manghod indi na luyag magpuyo upod sa iya amay. Gin-ayo niya ang iya amay nga ihatag na sa iya ang iya bahin sa kuwarta sang pamilya. Dayon naghalin sia sa ila panimalay kag naglakat sa pungsod nga malayo.

Lucas 15:11–13

Naghimo sang indi maayo nga mga pagpili ang anak. Gin-usikan niya ang kuwarta nga ginhatag sang iya amay sa iya.

Lucas 15:13

Sang maubos na ang tanan niya nga kuwarta, ginutom sia kaayo. Wala sang mahatag sa iya sing bisan ano nga makaon. Sang ulihi nakakita sia sang trabaho bilang manugpakaon sang baboy. Ang anak gutom na gid kaayo, ginhandum niya nga kuntani makaon niya ang pagkaon sang baboy. Nahibal-an niya nga kinahanglan niya nga magbalik sa iya amay.

Lucas 15:14–18

Pero ang anak indi sigurado nga batunon pa sia liwat sang iya amay. Nagdesisyon sia nga ayuon niya ang iya amay kon pwede sia mangin suluguon.

Lucas 15:17–19

Samtang nagalakat ang anak pauli, nakita sia sang iya amay halin sa malayo. Nalipay gid ang amay, nagdalagan sia sa iya anak!

Lucas 15:20

Ginhakos sang amay ang iya anak kag ginhalokan. Ginsugo niya ang iya mga suluguon nga magdala sing pinakamanami nga bayo para sa iya anak kag magpreparar sang sinalusalo. Gusto niya nga magsaulog kag magkalipay ang tanan kay nakapauli na ang iya anak.

Lucas 15:20–24

Sa tanan nga tion, ang magulang nga anak nagapangabudlay sa uma. Sang magbalik sia sa balay, nabatian niya ang musika kag sinaot. Ginpamangkot niya ang suluguon kon ano ang nagakatabo. Ginsugiran sia sang suluguon nga ang iya utod nagpauli, gani may sinalusalo sila para magselebrar.

Lucas 15:25–27

Naakig ang magulang nga utod. Gin-agda sia sang iya amay sa sinalusalo, pero indi sia magkadto. Ginsukmatan niya ang iya amay nga nag-alagad sia sa iya sa sulod sang madamo nga tinuig, pero wala gid sang naghatag sa iya sing sinalusalo. Ginsilingan sia sang amay, “Imo ang tanan nga akon,” pero maayo gid nga magpangalipay kon may nagahinulsol kag nagapauli!

Lucas 15:28–32