Si Jesus Nagpakita kay Saul

Si Saul isa ka Fariseo—lider sang mga Judio nga kabalo gid sang balaan nga kasulatan. Pero wala nagapati si Saul nga si Jesus amo ang Manluluwas. Kasami nga ginapapriso niya ang mga sumulunod ni Jesus. Isa ka adlaw nagbiyahe si Saul pakadto sa siyudad nga ginatawag Damasco para dakpon ang iban nga sumulunod ni Jesus kag dal-on sila sa Jerusalem para silotan.

Mga Binuhatan 9:1–2; 22:4–5; 26:5

Samtang nagabiyahe si Saul, gulpi lang nga may kasanag nga nagsilak sa iya. Mas masanag pa sangsa adlaw. Natumba si Saul sa duta. Nabatian niya ang tingug nga nagasiling, “Saul, Saul.” Dayon ginpamangkot sang tingug si Saul kon ngaa nga nagapakig-away sia kay Jesus kag ginasakit ang Iya mga disipulo.

Mga Binuhatan 9:3–4; 26:13–14

Namangkot si Saul kon sin-o ang nagahambal. Siling sang tingug, “Ako si Jesus.” Nakulbaan si Saul kag nakibot. Ginpamangkot niya si Jesus kon ano ang dapat niya himuon. Ginsugo ni Jesus si Saul, “Tindog ka kag magkadto sa siyudad.” Dayon mahibal-an niya kon ano ang madason niya nga himuon.

Mga Binuhatan 9:5–6

Nagtuman si Saul kag nagtindog. Pero bulag na sia karon. Waay na sia sang makita. Gintuytuyan sia sang mga tawo nga upod niya pasulod sa siyudad sang Damasco. Sa tatlo ka adlaw, wala nagkaon ukon nag-inom si Saul.

Mga Binuhatan 9:8–9

Isa sa mga disipulo ni Jesus nga nagaestar sa Damasco amo si Ananias. Ginbisitahan ni Jesus si Ananias sa isa ka panan-awon kag ginsugo sia nga magkalat kag buligan si Saul.

Mga Binuhatan 9:10–12

Pero naglibog ang ulo ni Ananias. Nakabati na sia parte kay Saul. Kabalo sia kon ano ang pagkontra ni Saul sa mga disipulo ni Jesus.

Mga Binuhatan 9:13–14

Ginsugo ni Jesus si Ananias nga buligan gihapon si Saul. Ginsiling ni Jesus nga ginpili Niya si Saul para dal-on ang Iya ebanghelyo sa madamo nga katawhan nga indi Judio kag wala pa nakabalo parte sa Iya.

Mga Binuhatan 9:15–16

Gintuman ni Ananias si Jesus. Nakita niya si Saul kag ginhatagan sia sang bendisyon. Gintawag sia ni Ananias “Utod Saul.”

Mga Binuhatan 9:17

Ginsiling ni Ananias nga ginpadala sia ni Jesus para nga mag-ayo si Saul kag mapuno sang Balaan nga Espiritu. Sa gilayon, nakakita liwat si Saul.

Mga Binuhatan 9:17–18

Ginbunyagan si Saul. Dayon gintudloan niya ang tanan sa siyudad parte kay Jesucristo. Nakadayaw gid ang mga tawo sa kadako sang pagbag-o ni Saul. Sa bilog niya nga kabuhi, gintawag si Saul nga Pablo. Gintudloan niya ang tanan nga katawhan, mga Judio kag iban pa, nga magpati kay Jesus. Si Pablo nangin Apostoles ni Jesucristo.

Mga Binuhatan 9:18–22, 29–31; 13:9