Mga Sugilanon sa Balaan nga mga Kasulatan

Pagkabuhi paagi sa Pagtuo kay Jesucristo—Sia “ang pangulo kag manughimpit sang aton pagtuo”

Mga Hebreo 11–12

Pagkabuhi paagi sa Pagtuo kay Jesucristo

Sia “ang pangulo kag manughimpit sang aton pagtuo”

Llalaki kag bata nga babayi ang nagatan-aw sa mga tawo nga ginapangguba ang ila mga kulon.

Indi sadto pirme mahapos nga mangin sumulunod ni Jesucristo sang una nga mga inadlaw sang Simbahan. Ang mga tawo kon kaisa nainit sa mga miyembro sang Simbahan ukon nagayaguta sa ila tungod sang ila mga pagpati. Gusto ni Pablo nga buligan sila nga matipigan ang ila pagtuo kay Jesucristo.

Mga Hebreo 10:32–39

Lalaki kag bata nga babayi nga nagapangamuyo, nga si Pablo ang ara sa atubang.

Si Pablo nagsulat sa Hebreo, ukon Judio, nga mga Santos. Gintudlo niya nga ang pagtuo nagakahulugan sang pagpati kag paglaum sa isa ka butang, bisan pa nga indi naton ini makita. Halimbawa, ang pagtuo kay Jesucristo nagakahulugan sang pagsalig sa Iya kag sa Iya mga promisa, bisan pa nga wala pa naton mabaton ang mga bugay nga aton ginalauman.

Mga Hebreo 11:1, 6

Bata nga babayi nga nagayuhum samtang ang lalaki nagabasa sang mga sugilanon parte sa mga tawo nga may pagtuo.

Agud buligan ang mga Santos nga Hebreo nga atubangon ang ila mga kabudlayan nga may pagtuo, ginpahanumdum sila ni Pablo sang mga sugilanon parte sa mga tawo sa balaan nga mga kasulatan nga may dako nga pagtuo.

Mga Hebreo 11:4–40

Si Noe nga nagatan-aw sang mga instruksyon sa pagtukod sang arka.

Halimbawa, ginsugid ni Pablo ang parte kay Noe. Ginsugo sang Dios si Noe nga magtukod sang arka para maluwas ang iya pamilya sa anaw. Si Noe may pagtuo nga magtuman, bisan wala pa niya makita ang ulan.

Mga Hebreo 11:7

Si Abraham kag si Sara nga nagabiya sa ila puluy-an.

Si Pablo nag-istorya parte kay Abraham kag Sara, nga may pagtuo nga magbiya sa ila puluy-an tungod nagpromisa ang Dios nga giyahan sila padulong sa mas maayo nga lugar. Nagtuo man sila sa promisa sang Dios nga makaangkon sila sing dako kaayo nga pamilya, bisan nga tigulang na sila kag wala pa sing kabataan.

Mga Hebreo 11:8–16

Iloy kag utod nga babayi ni Moises nga nagatago sa iya sa isa ka basket.

Ginsugid man ni Pablo ang parte sa iloy ni Moises nga si Jocabed. May pagtuo sia nga taguon si Moises, sang lapsag pa sia, para amligan sia nga malain nga hari.

Mga Hebreo 11:23

Si Moises nga ginapanilagan ang isa ka Egiptohanon nga nagamaltrato sa isa ka Israelnon.

Si Moises nagdako sa Egipto. Pwede gid kuntani sia nga mangin manggaranon kag komportable. Pero ginbiyaan niya ini tanan tungod may pagtuo sia sa Dios kag sa Iya mga pagpakamaayo.

Mga Hebreo 11:24–27

Si Moises nga ginatunga ang Pula nga Dagat.

Tungod sang iya pagtuo, napagwa ni Moises ang katawhan sang Dios halin sa pagkaulipon. Nagpanglakaton pa gani sila sa Pula nga Dagat sa mamala nga duta!

Mga Hebreo 11:29

Ginsugid man ni Pablo ang parte kay Rahab. May pagtuo sia sa pagbulig sa katawhan sang Dios, bisan pa nga wala sing iban sa iya siyudad ang nagapati sa Ginuo. Ang iya pagtuo nagsalbar sang iya pamilya.

Mga Hebreo 11:30–31

Ang lalaki kag ang bata nga babayi nga nagatulok sa kulon nga ila ginkay-o.

Si Pablo nagsiling nga ining madamo nga halimbawa sang pagtuo makabulig sa aton nga magtuo man kay Jesucristo, bisan pa kon ang kabuhi mabudlay. Mahimo kita maghinulsol sang aton mga sala kag magtulok kay Jesus, ang “pangulo kag manughimpit sang aton pagtuo.” Handa Sia nga mapatay para sa aton tungod nakahibalo Sia nga ang Iya Pagbayad-Sala magadala sing dako nga kalipay kag pag-ayo!

Mga Hebreo 12:1–2