Mga Sugilanon sa Balaan nga mga Kasulatan

Si Cornelio kag ang Iya mga Abyan Nakabaton sang Balaan nga Espiritu—Ang ebanghelyo para sa tanan

Mga Binuhatan 10

Si Cornelio kag ang Iya mga Abyan Nakabaton sang Balaan nga Espiritu

Ang ebanghelyo para sa tanan

Si Cornelio kag ang iya pamilya nga nagabulig sang nagakinahanglan.

Si Cornelio isa ka lider sang mga soldado nga Romano. Sia kag ang iya pamilya nagapati sa Dios, pero indi sila mga Judio kag wala nakahibalo parte kay Jesucristo. Ginapakigbahin ni Cornelio ang ara sa iya sa mga pigado kag pirme nagapangamuyo sa Dios.

Mga Binuhatan 10:1–2

Isa ka hapon, may anghel nga nagpalapit kay Cornelio samtang nagapuasa sia kag nagapangamuyo. Siling sang anghel, “Cornelio, ang imo pangamuyo ginpamatian.” Nakita sang Dios ang iya kaayo. Ginsugo sang anghel si Cornelio nga pangitaon si Apostoles Pedro, nga nagatiner sa siyudad nga ginatawag nga Jope. Ihambal ni Pedro kay Cornelio kon ano ang himuon.

Mga Binuhatan 10:3–6, 30–32

Ginsugo ni Cornelio ang iya mga alagad nga pangitaon si Pedro.

Ginhambalan ni Cornelio ang iya mga suluguon kon ano ang ginhambal sang anghel. Ginpadala niya sila sa Jope para hambalon si Pedro nga bisitahan sia.

Mga Binuhatan 10:7–8

Si Pedro nga nagaluhod kag nagapangamuyo.

Sa Jope, ara si Pedro sa atop sang balay nga nagapangamuyo. Ginagutom sia kag hana na nga magkaon, sang gulpi lang sia nakakita sang panan-awon.

Mga Binuhatan 10:9–10

Nakakita si Pedro sang dako nga habol nga nagapanaog halin sa langit, nga puno sang tanan nga klase sang kasapatan kag mga pispis. Dayon nakabati si Pedro sang tingug nga naghambal nga dapat kaunon niya atong mga kasapatan. Pero amo ini ang kasapatan nga indi pwede kaunon sang mga Judio. Siling sang layi ni Moises nga mahigko ini sila. Indi ini gusto ni Pedro kaunon.

Mga Binuhatan 10:11–14

Siling sang tingug nga kon may ginhimo ang Dios nga matinlo, indi ini dapat tawgon nga mahigko. Nasulit ang panan-awon sing tatlo ka beses. Naglibog ang ulo ni Pedro kon ano ang buot silingon sini.

Mga Binuhatan 10:15–17

May tingug nga naghambal kay Pedro nga makigkita sa mga alagad ni Cornelio.

Sang amo man nga tion, naghambal ang Espiritu kay Pedro nga may tatlo ka tawo nga nagapangita sa iya. “Mag-upod ka sa ila,” siling sang Espiritu, “kay ako ang nagpadala sa ila.”

Mga Binuhatan 10:16–21

Si Pedro nga nagapakighambal sa mga alagad ni Cornelio.

Ang tatlo ka tawo mga alagad ni Cornelio. Ginsugid nila kay Pedro ang parte sa anghel nga nakita ni Cornelio kag ginpangabay si Pedro kon pwede sia niya tudloan. Ang mga Judio kasami wala nagasulod sa mga balay nga indi iya ka Judio, kag wala sila ginatudloan sang mga Apostoles sang ebanghelyo. Pero sang madumduman niya ang iya panan-awon, nagdesisyon si Pedro nga maglakat.

Mga Binuhatan 10:22, 28

Nagkilalahay si Pedro kay Cornelio kag sang iya pamilya kag mga abyan.

Pag-abot ni Pedro, nagahulat si Cornelio sa iya upod ang madamo niya nga mga abyan kag mga miyembro sang pamilya. Ginhambalan niya si Pedro nga handa sila sa pagpamati sang bisan ano nga ginsugo sang Dios nga iya ihambal sa ila.

Mga Binuhatan 10:26, 33

Si Pedro nagatudlo parte kay Jesucristo.

Karon naintiendihan na ni Pedro ang ginatudlo sang Dios sa iya sa panan-awon. Ginhambal ni Pedro sa tanan nga ang Dios wala sang ginapasulabi nga nasyon ukon grupo. Ginabaton sang Dios ang bisan sin-o nga nagasunod sa Iya kag nagahimo sang insakto. Gintudloan ni Pedro si Cornelio kag ang iya pamilya kag mga abyan parte kay Jesucristo.

Mga Binuhatan 10:34–43

Ginbunyagan ni Pedro ang panimalay kag mga abyan ni Cornelio.

Samtang nagatudlo sia, nag-abot ang Balaan nga Espiritu sa tanan nga nagapamati. Gin-imbitar sila ni Pedro nga magpabunyag sa ngalan ni Jesucristo. Natun-an ni Pedro nga ang tanan nga anak sang Dios ginabaton sa Simbahan ni Jesucristo. Ang ebanghelyo ni Jesucristo ginwali sa tanan.

Mga Binuhatan 10:44–48