Ang Katapusan nga Panyapon

Ginapakilala ni Jesus ang sakramento

Ara si Jesus kag ang Iya mga Apostoles sa Jerusalem para magselebrar sang Pascua (Passover). Ginaselebrar sang katawhan nga Judio ang Pascua kada tuig. Ginabuligan sila sini nga madumduman nga, madamo nga tinuig na ang nagligad, ang ila mga pamilya mga ulipon sa Egipto, kag ginbuligan sila sang Dios nga makapalagyo.

Exodo 12:27

Si Jesus kag ang Iya mga Apostoles nagtipon sa lamisa.

Sang ara sila sa Jerusalem, naghiwat sang espesyal nga sinalu-salo si Jesus kag ang Iya mga Apostoles. Ginapaabot na ni Jesus nga ipakigbahin ini nga panyapon sa ila.

Lucas 22:7–15

Si Jesus nga ginahugasan ang tiil sang isa sang Iya mga Apostoles.

Pagkatapos nila nga magkaon, ginsudlan ni Jesus sang tubig ang labador. Ginsugdan Niya nga hugasan ang mga tiil sang Iya mga Apostoles.

Juan 13:4–5

Si Pedro nga nagapamangkot kon ngaa ginahugasan ni Jesus ang ila mga tiil.

Sang turno na ni Pedro, ginpamangkot niya kon ngaa ginahimo ini ni Jesus. Ang paghugas sang tiil isa ka butang nga kasami ginahimo lang sang mga suluguon.

Juan 13:6

Si Jesus nga ginatudloan ang Iya mga Apostoles kon paano magpalangga sa kada isa.

Siling ni Jesus nga ginahugasan Niya ang ila mga tiil para magpakita sang ehemplo sa ila. Gusto Niya nga magserbisyo sila kag magpalanggaanay pareho sang Iya pagpalangga sa ila. Kon himuon nila ini, mahibal-an sang mga tawo nga Iya sila mga disipulo.

Juan 13:14–16, 34–35

Ginhambal ni Jesus sa Iya mga disipulo nga mapatay na Sia sa indi madugay. Siling ni Pedro nga handa sia nga magpanginmatay para kay Jesus.

Juan 13:36–38

Pero kabalo si Jesus nga magaabot ang mabudlay nga tinion. Ginhambalan Niya si Pedro nga antes magpamalo ang sulog pagkadason nga adlaw, ihambal ni Pedro sing tatlo ka beses nga indi niya kilala si Jesus.

Juan 13:38

Si Jesus nga nagatudlo sa Iya mga Apostoles parte sa Balaan nga Espiritu.

Nabal-an ni Jesus nga mahimo mabalaka kag mahadlok ang Iya mga Apostoles. Ginpromisa Niya nga ipadala sang Dios sa ila ang Balaan nga Espiritu. Paumpawan sila sang Balaan nga Espiritu, tudloan, kag buligan sila nga madumduman ang gintudlo ni Jesus sa ila. Ginhambalan Niya sila nga indi magkabalaka ukon mahadlok. Siling Niya, “Kon ginahigugma ninyo ako, tumanon ninyo ang akon mga sugo.”

Juan 14:1, 15–16, 26–27

Si Jesus nga nagasipad-sipad sang tinapay para sa sakramento.

Dayon ginhimo ni Jesus ang isa ka butang nga espesyal kaayo para mabuligan ang Iya mga Apostoles nga madumduman Sia pirme. Ginhatagan Niya sila sang sakramento. Una, ginbendisyonan Niya ang tinapay, ginsipad-sipad, kag ginhatag ini sa Iya mga Apostoles. Ginhambalan sila ni Jesus nga panumdumon ang Iya lawas kon magkaon sila sang tinapay. Ginpangabay Niya sila nga panumdumon nga mapatay Sia para sa ila.

Mateo 26:26; Lucas 22:19

Si Jesus nga ginabendisyonan ang bino para sa sakramento.

Dayon ginsudlan ni Jesus sang bino ang kopa. Ginbendisyonan Niya ang bino kag ginhambalan ang mga Apostoles nga imnon ini. Ginhambal Niya sa ila nga panumdumon ang Iya dugo samtang ginainom nila ang bino. Ginpangabay Niya sa ila nga panumdumon nila nga Sia magaantos, magadugo ang kalawasan, kag mapatay para sa kasakit kag mga sala sang tanan nga katawhan para mahimo kita nga maghinulsol kag mapatawad.

Mateo 26:27–28; Lucas 22:20

Si Jesus nga nagatudlo sa Iya mga Apostoles nga tumanon ang Iya mga kasugoan.

Dayon ginpaathag ni Jesus nga daw pareho Sia sa balagon, kag ang Iya mga disipulo daw pareho sa mga sanga. Kon ang sanga naangot sa balagon, nagapamunga ini. Ang sanga nga wala nagaangot sa balagon mapatay kag indi makapamunga. Gusto ni Jesus nga mangin malapit pirme ang Iya mga disipulo sa Iya paagi sa pagpalanggaanay kag pagtuman sang Iya mga kasugoan.

Juan 15:4–12

Si Jesus kag ang Iya mga Apostoles nga nagalakat pakadto sa Getsemani.

Pagkatapos nga magtudlo sining mga butang, nagkanta si Jesus kag ang Iya mga Apostoles sang isa ka himno. Naglakat sila pakadto sa hardin nga ginatawag Getsemani.

Mateo 26:30