Ang Paanggid sang Pulo ka Dalaga

Ang mangin handa para sa pagbalik ni Jesus

Ginapamangkot sang mga disipulo ni Jesus kon san-o Sia magbalik.

Nahibal-an sang mga disipulo ni Jesus nga sa pila ka adlaw, pagkatapos nga makabalik na Sia sa Iya Amay, mabalik liwat si Jesus sa duta. Ginpamangkot Sia nila kon paano nila mabal-an kon san-o Sia mabalik liwat. Gusto nila nga mangin handa para sa Iya. Para sabton sila, nag-istorya si Jesus sang isa ka paanggid.

Mateo 24:3

Sa paanggid, pulo ka dalaga ang makadto sa isa ka kasal. Gab-i ang kasal, gani kinahanglan gid sang mga dalaga magdala sang mga kingki nga may lana para magsanag ang ila alagyan. Ang lima sa mga dalaga maalam kag nagbalon sang damo nga lana. Ang lima sa ila indi maalam kag wala nagbalon sang lana.

Mateo 25:1–4

Natulugan ang mga dalaga samtang nagahulat sa kalaslon nga lalaki.

Kinahanglan sang mga dalaga nga hulaton ang kalaslon nga lalaki kag ang iya grupo nga mag-abot. Pero nadugayan ang kalaslon nga lalaki. Samtang nagahulat sila, tanan sila natulugan.

Mateo 25:5

May naghambal nga manug-abot na ang kalaslon nga lalaki.

Sa tunga-tunga sang gab-i, may nagsinggit nga maabot na gid man ang kalaslon nga lalaki! Oras na nga mag-upod sa iya ang mga dalaga sa sinalu-salo sa kasal.

Mateo 25:6

Ang lima ka dalaga nakapasiga sang ila mga kingki. Ang lima pa ka dalaga naubusan sang lana.

Gin-alsa sang tanan nga dalaga ang ila mga kingki para magsanag ang ila alagyan. Pero ang lima ka dalaga nga wala nagbalon sang lana napatyan sang kingki. Naubos ang ila lana samtang nagahulat sila sa kalaslon nga lalaki.

Mateo 25:7–8

Naglakat ang mga babayi nga naubusan para magbakal sang dugang nga lana.

Nangayo ang lima ka dalaga nga wala nagbalon sang lana sa iban. Pero hustuhan lang gid ang ila dala para sa ila. Dali-dali nga naglakat ang lima ka dalaga para magbakal sang dugang nga lana.

Mateo 25:8–9

Nag-abot ang kalaslon nga lalaki kag nagpakighambal sa lima ka dalaga nga nakahanda.

Samtang wala pa sila, nag-abot ang kalaslon nga lalaki! Ang lima ka dalaga nga nakahanda nakaupod sa iya sa kasal.

Mateo 25:10

Ang mga dalaga nga naglakat para magbakal sang lana indi na makasulod sa kasal.

Sang pagbalik sang iban nga mga dalaga, sirado na ang puwertahan. Nanuktok sila kag ginpangabay ang kalaslon nga lalaki nga pasudlon sila. Pero ulihi na sila kaayo. Indi na sila pagpasudlon sa kasal.

Mateo 25:11–12

Nagatudlo si Jesus sa Iya mga sumulunod nga mangin handa sa Iya pagbalik.

Si Jesus daw pareho sa kalaslon nga lalaki sa paanggid. Wala sang may nakabalo kon san-o Sia mabalik liwat. Ang Amay nga Langitnon lang gid ang nakabalo. Gani ginhambalan ni Jesus ang Iya mga sumulunod nga mangin pareho sa lima ka babayi nga nagbalon sang lana. Ang mga tawo nga nagatuman sang mga kasugoan sang Ginuo kag nagasunod sa Espiritu mangin handa sa pagbalik liwat ni Jesucristo.

Mateo 24:36; 25:13; Doktrina kag mga Kasugtanan 45:56–57