Mga Sugilanon sa Balaan nga mga Kasulatan

Si Jesus Nagasakay [sa Asna] Pasulod sa Jerusalem—Ginaabiabi sang mga tawo ang ila Manluluwas

Mateo 21:1–16

Si Jesus Nagasakay [sa Asna] Pasulod sa Jerusalem

Ginabiabi sang mga tawo ang ila Manluluwas

Ang mga tawo nga nagahulat para sugaton si Jesus sa gwa sang Jerusalem.

Malapit na ang tion sang Paskua, isa ka importante nga piyesta para sa mga Judio. Madamo ang mga tawo nga nagkadto sa Jerusalem para sa Paskua. Si Jesus kag ang Iya mga disipulo nagkadto man. Sang mabatian sang mga tawo nga nagapakadto si Jesus, ginsugat nila Sia.

Mateo 21:1; Juan 12:12–13

Si Jesus kag ang Iya mga disipulo nga nagahilapit na sa Jerusalem.

Sang si Jesus kag ang Iya mga disipulo malapit na sa Jerusalem, ginpangabay Niya sila nga magdala sing asna sa Iya. Madamo nga tinuig ang nagligad, isa ka propeta ang nagsiling nga ang Manluluwas magaabot sing mapainubuson, nga nagasakay sa isa ka bataon pa nga asna.

Mateo 21:1–7; tan-awa man sa Zacarias 9:9

Si Jesus nagsulod sa banwa nga nagasakay sa asna. Malipayon kaayo ang mga tawo sang makita Sia. Ginabiabi nila Sia nga daw pareho sang isa ka hari. Ginbutangan nila sang mga sanga sang palma kag mga bayo ang duta nga laktan sang asna. Nagpasalamat sila sa Dios kag nagsinggit, “Hosana: Dayawon ang Hari sang Israel nga nagaabot sa ngalan sang Ginuo.”

Mateo 21:8–9; Lucas 19:36–38; Juan 12:13

Madamo nga tawo sa Jerusalem ang natingala kon ano ang nagakatabo. “Sin-o bala sia?” pamangkot nila. Ang iban nagsabat nga sia si Jesus sang Nazaret.

Mateo 21:10–11

Nakita ni Jesus ang mga tawo nagabaylohanay sang kuwarta sa templo.

Dason, nagkadto si Jesus sa templo. Pila ka tawo ang nagabaylohanay sang kuwarta kag nagabaligya sang mga sapat nga inughalad. Kabalo si Jesus nga nagapangdaya sila.

Mateo 21:12

Ginsingganan ni Jesus ang mga tawo nga nagabaylohanay sang kuwarta nga maghalin sa templo.

Wala maluyagi ni Jesus nga nagapangwarta sila sa mga tawo nga gusto magsimba sa templo. Ginpahalin Niya sila sa templo kag ginpanumba ang ila mga lamesa. Siling Niya, “Ang akon balay tawgon nga balay nga palangamuyuan, apang ginhimo ninyo ini nga palanaguan sang mga makawat.”

Mateo 21:12–13; tan-awa man sa Isaias 56:7; Jeremias 7:11

Si Jesus nagapang-ayo sang mga tawo sa templo.

Ang mga tawo nga bulag ukon indi makalakat nagkadto kay Jesus sa templo, kag Iya sila ginpang-ayo. Ang mga bata nagsininggit, “Hosana,” nga nagadayaw kay Jesus kag nagasiling nga Sia ang Manluluwas.

Mateo 21:14–15

Si Jesus nga nagapakighambal sa mga pari kag mga escriba.

Ang iban sang mga pari kag mga escriba naakig sang ila makita ang ginhimo ni Jesus kag nabatian ang ginahambal sang mga kabataan. Ginpadumdom sila ni Jesus parte sa balaan nga kasulatan nga nagasiling nga ang Dios magahimo sang himpit nga pagdayaw nga maghalin sa baba sang mga kabataan.

Mateo 21:15–16; tan-awa man sa Salmo 8:2