Si Jesukristo Moanhi Pag-usab

Panan-awon ni Juan sa paglaom diha ni Jesukristo

Si Apostol Juan dihay usa ka espesyal nga panan-awon. Nakita niya si Jesukristo, kinsa mipakita ni Juan sa daghang mga butang mahitungod sa milabay ug umaabot nga panahon. Gisugo niya si Juan sa pagsulat sa mga butang nga iyang nakita. Nahibalo si Jesus nga ang mga Santos naningkamot sa ilang labing maayo sa pagsunod Kaniya. Buot ni Jesus kanila nga magbaton og paglaom nga Siya mas gamhanan kay sa daotan sa kalibotan.

Pinadayag 1:1–2, 9–11, 13–15, 19; 2–3

Ang Langitnong Amahan nga ang Iyang kamot diha sa abaga ni Jesukristo.

Diha sa iyang panan-awon, si Juan nakakita og basahon nga walay usa nga makaabli. Dayon si Juan nakakita og usa ka nating karnero nga nagrepresentar ni Jesukristo; Siya makaabli sa basahon. Nakat-onan ni Juan nga sa wala pa gilalang ang kalibotan, ang Langitnong Amahan mipili ni Jesukristo nga mahimong atong Manluluwas. Kini mao ang labing importante nga bahin sa plano sa Dios, ug si Jesus lamang ang makabuhat niini.

Pinadayag 5

Si Satanas ug usa ka pundok sa espiritu nga mga anak mibiya sa langit.

Nakita usab ni Juan ang usa ka dragon nga nagrepresentar ni Satanas. Si Satanas wala makagusto sa plano sa Dios. Gisugdan niya ang usa ka gubat sa langit. Kadaghanan sa espiritung mga anak sa Langitnong Amahan nagbaton og hugot nga pagtuo ni Jesukristo ug mipili sa pagsunod Kaniya. Apan ang uban kanila mipili sa pagsunod ni Satanas. Tungod sa ilang pagpili, sila kinahanglang mobiya sa langit.

Pinadayag 12:3–11

Usa ka gitipon nga imahe nagpakita og mga sundalo nga nagmartsa, mga tawo nga nagkalisod, ug kagutom.

Nakita ni Juan nga si Satanas ug ang iyang mga sumusunod mipadayon sa pagpakig-away batok ni Jesus ug sa Iyang mga sumusunod dinhi sa yuta. Naninguha sila sa pagbitik sa mga tawo ngadto sa dili pagtuo sa ebanghelyo sa Manluluwas. Dihay daghang gubat, pagkaguba, ug sakit.

Pinadayag 6; 8–9; 12:17; 13:11–18; 17–18

Si anghel Moroni naggiya ni Joseph Smith ngadto sa bulawan nga mga palid.

Apan ang Langitnong Amahan mipadala og mga anghel gikan sa langit uban sa ebanghelyo ni Jesukristo, aron kini mapakigbahin sa tanan dinhi sa yuta.

Gipadayag 14:6–7

Usa ka pamilya nga nag-ambit sa sakramento.

Pipila sa mga tawo motuo ni Jesus ug nagsunod sa Iyang mga sugo, sama sa ilang gibuhat didto sa langit. Ang ilang pagpamatuod ni Jesus motabang kanila sa pagdaog sa gubat batok ni Satanas.

Pinadayag 12:11; 19:8–10

Si Jesus nanaog gikan sa langit, uban sa mga anghel sa Iyang luyo.

Nakita ni Juan nga si Jesukristo moanhi pag-usab sa yuta. Siya mao ang mahimong Hari sa tibuok kalibotan. Si Satanas mawad-an na og gahom. Tungod ni Jesus, walay nay kaguol o kasakit. Ang tanang mga tawo kinsa nagtuo ni Jesus ug nagsunod sa mga pakigsaad uban Kaniya mopuyo uban Kaniya ug sa Langitnong Amahan sa kahangtoran.

Pinadayag 19:11–16; 20:1–2; 21:1–7