Si Jesus Nagtudlo sa Wali didto sa Bungtod—Nagtabang kanato nga mas mahisama sa atong Langitnong Amahan

Mateo 5–7

Si Jesus Nagtudlo sa Wali didto sa Bungtod

Nagtabang kanato nga mas mahisama sa atong Langitnong Amahan

Si Jesus nga nagtudlo duol sa Dagat sa Galilea.

Si Jesus ug ang Iyang mga disipulo miadto sa bukid duol sa Dagat sa Galilea. Didto gitudloan sila ni Jesus sa unsang paagi kita magmalipayon ug mas mahisama sa atong Langitnong Amahan.

Mateo 5:1–2

Si Jesus nga nagtudlo kon unsaon nato sa pagpakigdait sa uban.

Si Jesus mitudlo nga ang katawhan mapanalanginan ug malipayon kon sila mapaubsanon, putli og kasingkasing, ug maningkamot sa pagbuhat sa unsay husto. Ang mga tawo nga mopasaylo sa uban mapasaylo. Ang mga tawo nga makigdait pagatawgon nga mga anak sa Dios.

Mateo 5:3–9

Kinahanglan nga mahisama kita nga kahayag sa kalibotan.

Miingon si Jesus nga ang Iyang mga disipulo mao ang kahayag sa kalibotan—sama sa siyudad nga naa sa bungtod nga makita sa tanan. Dili gayod nato itago ang atong kahayag.

Mateo 5:14

Ang maayo natong mga buhat mahisama sa kahayag alang sa uban.

Kon atong sundon si Jesus, sama kita sa kandila nga naghatag og kahayag ngadto sa tanan sulod sa lawak. Ang atong mga maayong buhat makatabang sa mga tawo aron motuo sa Langitnong Amahan.

Mateo 5:15–16

Si Jesus nagtudlo nga kita mohigugma gayod sa tanan.

Si Jesus miingon nga kita gayod mohigugma sa tanan—bisan ngadto sa mga tawo nga wala mahigugma kanato. Kinahanglan nga kita mag-ampo alang nila. Si Jesus mitudlo nga kita kinahanglan nga mahisama sa Langitnong Amahan. Siya mitudlo nga kon kita motabang og mga tawo, dili kinahanglan nga sultihan nato ang tanan sa unsay atong gibuhat. Ang Dios nagtan-aw sa maayong mga butang nga atong gihimo, ug Siya mopanalangin kanato.

Mateo 5:38–48; Mateo 6:1–4

Kinahanglan nga mag-ampo kita gikan sa atong kasingkasing.

Kon mag-ampo ta, kinahanglan nga dili kita mabalaka mahitungod sa unsay gihunahuna sa ubang mga tawo mahitungod kanato. Kinahanglan nga dili ta molitok sa mao ra gihapon nga mga pulong kon wala nato kinahanglana. Kinahanglan nga isulti nato ang gikan sa atong kasingkasing. Ang Langitnong Amahan makadungog sa atong mga pag-ampo ug nasayod sa unsay atong gikinahanglan. Bisan kon walay bisan usa nga makadungog kanato, Siya makadungog.

Mateo 6:5–8

Kinahanglan nga atong trataron ang uban sama sa unsay gusto nato nga kita trataron sa uban.

Mitudlo si Jesus nga dili kita angay maghunahuna nga mas labaw kita kay sa ubang tawo. Kinahanglan nga atong hinumdoman nga tanan kita adunay mga hagit. Imbis manghukom sa uban, kinahanglan nga hunahunaon nato unsaon nga makahimo kita og mas maayo. Kinahanglang trataron nato ang tawo sama sa atong gusto nga kita trataron.

Mateo 7:1–5, 12

Si Jesus nga nagtudlo bahin sa balay nga gitukod ibabaw sa bato.

Si Jesus misugilon og usa ka istorya mahitungod sa tawo nga buangon nga mitukod sa iyang balay ibabaw sa mga balas ug sa usa ka maalamon nga tawo nga mitukod sa iyang balay ibabaw sa bato. Dihang ang bagyo miabot, ang balay nga gitukod ibabaw sa balas nabanlas, ug ang balay nga gitukod ibabaw sa bato pabiling nagbarog. Miingon si Jesus nga kon maminaw kita sa Iyang mga pagtulun-an, susama kita sa tawo nga maalam.

Mateo 7:24–28