Si Jesus Mipamatuod sa Iyang Misyon

Si Jesus miadto sa Nazaret, diin ang Iyang pamilya ug mga higala nagpuyo. Mao kadto ang dapit diin siya nagdako. Atol sa Adlawng Igpapahulay, miadto Siya sa sinagoga, diin ang mga tawo mangadto aron magtuon sa mga kasulatan ug mosimba sa Dios.

Lucas 4:16–17

Didto sa sinagoga, nagbarog si Jesus ug nagbasa sa kasulatan gikan sa propeta nga si Isaias. Ang kasulatan nag-ingon nga usa niana ka adlaw ang Manluluwas moabot. Magsangyaw Siya sa ebanghelyo ngadto sa mga kabos ug moayo sa mga kasingkasing nga nasakitan. Motabang Siya sa buta ug niadtong mga nasakitan.

Isaias 61:1–2; Lucas 4:17–19

Si Jesus nahuman na sa pagbasa ug milingkod. Ang tanan nagtan-aw Kaniya. Siya miingon kanila nga niana gayod nga adlaw, ang kasulatan nga Iyang gibasa matinuod. Siya ang Manluluwas.

Lucas 4:21

Ang mga tawo sa Nazaret natingala kaayo sa unsay gisulti ni Jesus. Sa unsang paagi si Jesus mahimo nga Manluluwas? Naghunahuna sila nga Siya usa lang ka anak ni Maria ug Jose, dili Anak sa Dios. Alang nila, Siya ingon og kasarangaran lang nga tawo.

Lucas 4:22

Nasayod si Jesus nga ang mga tawo gusto nga mohimo Siya og milagro aron mapamatud-an nga Siya mao ang Manluluwas. Iyang gitudlo nga ang mga milagro alang sa mga tawo nga motuo, ug usahay ang Dios mohimo og mga milagro ngadto sa dili sakop sa Israel kay mas dako sila og pagtuo. Ang pipila ka tawo sa sinagoga nangasuko kang Jesus.

Lucas 4:23–28

Gipugos nila siya sa pagpalayas sa siyudad ug padulong sa ibabaw sa bungtod. Gusto nilang ihulog siya sa pangpang.

Lucas 4:28–29

Apan mipalayo si Jesus gikan sa napungot nga mga tawo.

Lucas 4:30

Tungod kay wala sila makaangay Kaniya didto sa Nazaret, si Jesus miadto sa laing siyudad aron magtudlo.

Lucas 4:31–32