Ang Sambingay sa Maayo nga Samarianhon—Paghigugma sa atong mga silingan sama sa atong paghigugma sa atong kaugalingon

Lucas 10:25–37

Ang Sambingay sa Maayo nga Samarianhon

Paghigugma sa atong mga silingan sama sa atong paghigugma sa atong kaugalingon

Usa ka tawo nangutana ni Jesus og usa ka pangutana.

Usa ka magtutudlo sa balaod nangutana ni Jesus unsaon sa pagkadawat og kinabuhing dayon. Gipangutana siya ni Jesus kon unsay nakasulat sa mga kasulatan. Ang magtutudlo sa balaod mitubag nga ang mga kasulatan nag-ingon nga higugmaa ang Dios ug ang imong silingan. Miingon si Jesus nga eksakto siya. Dayon ang magtutudlo sa balaod nangutana, “Kinsa man ang akong silingan?” Si Jesus mitubag pinaagi sa pagsaysay og usa ka istorya.

Lucas 10:25–29

Usa ka Judeo nga gipasakitan sa mga tulisan.

Sa sambingay, usa ka tawo nga Judeo nagbiyahe sa dalan gikan sa Jerusalem ngadto sa Jerico. Sa kalit, pipila ka tulisan nangabot. Gikawat nila ang iyang mga sinina, gipasakitan siya og labihan, ug didto siya gibiyaan.

Lucas 10:30

Usa ka pari mibaliwala sa naangol nga tawo.

Wala madugay, usa ka pari miagi sa dalan. Ang usa ka pari mao ang tawo nga nagtrabaho sa templo. Nakita niya ang tawo didto sa dalan apan mitipas og agi sa pikas daplin.

Lucas 10:31

Usa ka Levita mibaliwala sa naangol nga tawo.

Sunod miabot ang laing tawo nga nagtrabaho usab sa templo, nga gitawag og Levita. Nakita niya ang tawo nga naangol, apan miagi ra siya sa pikas daplin sa karsada.

Lucas 10:32

Usa ka Samarianhon nakamatikod sa tawo nga Judeo.

Dayon usa ka Samarianhon ang miagi. Nakita niya ang tawo didto sa dalan nga grabe ang pagkaangol. Ang mga Samarianhon ug ang mga Judeo dili kaayo maayo ang pagtinagdanay. Apan kini nga Samarianhon bisan pa gustong motabang sa maong tawo.

Lucas 10:33

Ang Samarianhon nag-atiman sa tawo nga Judeo.

Ang Samarianhon miatiman sa tawo pinaagi sa pagbutang og lana ug bino sa mga samad sa tawo. Gipasakay niya ang tawo sa iyang gamayng asno.

Lucas 10:34

Ang Samarianhon midala sa tawo nga Judeo sa usa ka balay nga kasilongan.

Dayon ang Samarianhon midala sa tawo ngadto sa usa ka balay nga kasilongan, diin siya makapahulay ug maulian. Sa wala pa mobiya ang Samarianhon pagkasunod adlaw, gihatagan niya ang tinugyanan sa balay-abotanan og kwarta ug miingon, “Atimana siya.” Ang Samarianhon miingon nga mobalik siya paglabay sa pipila ka adlaw nga magdala og dugang kwarta.

Lucas 10:34–35

Giingnan ni Jesus ang magtutudlo sa balaod nga magpakahisama sa Samarianhon.

Dapit sa kataposan sa sugilanon, gipangutana ni Jesus ang magtutudlo sa balaod. Kinsa ang silingan sa tawo nga naangol? Ang pari, ang Levita, o ang Samarianhon? Ang magtutudlo sa balaod miingon kadtong tawo nga mipakita og gugma sa tawo—ang Samarianhon. Gisultihan ni Jesus ang magtutudlo sa balaod sa paglakaw ug magmahisama sa Samarianhon.

Lucas 10:36–37