Si Jesus Nagsakay padulong sa Jerusalem—Ang mga tawo miabiabi sa ilang Manluluwas

Mateo 21:1–16

Si Jesus Nagsakay padulong sa Jerusalem

Ang mga tawo miabiabi sa ilang Manluluwas

Ang mga tawo naghulat aron mohimamat ni Jesus sa gawas sa Jerusalem.

Hapit na ang oras alang sa Pagpalabay, usa ka importante nga kasaulogan alang sa mga Judeo. Daghang tawo ang nangadto sa Jerusalem alang sa Pagpalabay. Si Jesus ug ang Iyang mga disipulo nangadto usab. Dihang nadungog sa mga tawo nga moadto si Jesus, nangadto sila sa pagsugat Kaniya.

Mateo 21:1; Juan 12:12–13

Si Jesus ug ang Iyang mga disipulo nga nagkaduol na sa Jerusalem.

Dihang si Jesus ug ang Iyang mga disipulo nagkaduol na sa Jerusalem, Siya mihangyo kanila sa pagdala og usa ka asno ngadto Kaniya. Daghang katuigan ang milabay, usa ka propeta miingon nga ang Manluluwas moanhi sa mapaubsanong paagi nga magsakay og usa gamay nga asno.

Mateo 21:1–7; tan-awa usab sa Zacarias 9:9

Si Jesus misulod sa siyudad nga nagsakay sa asno. Ang mga tawo nangalipay kaayo nga nakakita Kaniya. Sila miabiabi Kaniya sama sa usa ka hari. Nanghanig sila og mga palwa nga may lukay ug mga panapton diha sa mga nataran nga agian sa asno. Nagpasalamat sila sa Dios ug nagsinggit, “Hosanna: Dalaygon ang mianhi sa ngalan sa Ginoo! ang Hari sa Israel.”

Mateo 21:8–9; Lucas 19:36–38; Juan 12:13

Daghang tawo sa Jerusalem naghunahuna kon unsay nanghitabo. “Si kinsa ni?” nangutana sila. Ang uban mitubag nga si Jesus sa Nazaret kadto.

Mateo 21:10–11

Nakita ni Jesus ang mga tawo nga namalit ug namaligya didto sa templo.

Sunod, si Jesus miadto sa templo. Pipila ka tawo didto namalit ug namaligya og mga hayop nga isakripisyo. Nasayod si Jesus nga dili sila matinuoron.

Mateo 21:12

Nag-ingon si Jesus sa mga tawo nga namalit ug namaligya sa pagbiya sa templo.

Dili gusto si Jesus nga mangwarta sila gikan sa mga tawo kinsa gustong mosimba sa templo. Gihimo Niya ang pagpabiya kanila sa templo ug gipangtumba ang ilang mga lamesa. Miingon siya, “Ang akong balay paganganlag balay-alampoanan,’ apan gihimo ninyo kini nga tagoanan sa mga tulisan.”

Mateo 21:12–13; tan-awa usab sa Isaias 56:7; Jeremias 7:11

Si Jesus nang-ayo og mga tawo sulod sa templo.

Ang mga tawo nga buta o kinsa dili makalakaw miadto kang Jesus sa templo ug Siya miayo kanila. Ang mga bata nagsinggit og “Hosana,” nagadayeg kang Jesus ug nag-ingon nga Siya ang Manluluwas.

Mateo 21:14–15

Si Jesus nakigsulti sa mga pari ug mga eskriba.

Ang pipila sa pari ug eskriba nasagmuyo dihang nakita nila ang gibuhat ni Jesus ug nadungog ang unsay gipangsulti sa mga bata. Si Jesus mipahinumdom kanila mahitungod sa kasulatan nga nag-ingon nga ang Dios mohimo og hingpit nga pagdayeg nga maggikan sa mga baba sa mga bata.

Mateo 21:15–16; tan-awa usab sa Salmo 8:2