Mga Buhat 21–22; 26–28
Mga Milagro atol sa Panaw ni Pablo ngadto sa Roma
Ang Ginoo nagpanalangin sa Iyang sulugoon
Ang Espiritu nagsulti ni Pablo sa pag-adto sa Jerusalem. Daghang mga tawo didto wala makagusto sa unsay gitudlo ni Pablo mahitungod ni Jesukristo. Ilang gidakop siya ug gigapos siya og mga kadena. Gisultihan ni Pablo ang tanan mahitungod sa panahon nga iyang nakita ang usa ka kahayag gikan sa langit, nadungog ang tingog ni Jesus, ug nabunyagan.
Mga Buhat 21:4, 12–13, 27–40; 22:1–16
Si Pablo gibilanggo. Samtang siya atoa didto, si Jesus mipakita ug miingon, “Sumalig ka, Pablo.” Miingon siya nga si Pablo manghimatuod Kaniya sa Roma.
Mga Buhat 23:10–11
Si Pablo gidala sa atubangan sa mga gobernador ug sa usa ka hari. Maisogon niyang gipanghimatuod si Jesukristo ngadto niining gamhanang mga tigmando. Gusto niya nga ang tanan motuo ni Jesus.
Mga Buhat 24:10–27; 25:6–8, 17–19; 26:1–29
Gipadala sa hari si Pablo ngadto sa Roma aron pagahukman ni Cesar, ang emperador. Mibiyahe si Pablo pinaagi sa sakayan kauban sa uban nga mga binilanggo, naghimo og mga paghunong sa giagian. Sa usa ka paghunong, nahibalo si Pablo nga kini mahimong tingtugnaw sa dili madugay. Kon sila magpadayon, sila maanaa sa dakong peligro. Iyang gisultihan ang mga tripulante sa sakayan sa paghulat hangtod ang panahon mas maarang-arang.
Mga Buhat 27:1–10
Walay usa nga mituo ni Pablo, busa sila mipadayon sa paglawig. Usa ka dakong bagyo miabot, ug ang sakayan gilamba-lamba sa mga balod sulod sa daghang mga adlaw. Dili nila makita ang adlaw o ang mga bitoon. Sila naghunahuna nga sila mangamatay sa bagyo.
Mga Buhat 27:11–20
Usa ka gabii, usa ka anghel sa Dios miduaw ni Pablo ug miingon, “Ayaw kahadlok, Pablo.” Ang anghel miingon nga si Pablo makaabot sa Roma, ingon nga ang Dios nakasaad. Siya miingon nga ang Dios mopanalipod sa tanan nga anaa sa sakayan—walay usa kanila nga mamatay.
Mga Buhat 27:23–24
Gisultihan ni Pablo ang tanan kon unsay gisulti sa anghel. “Sumalig kamo,” miingon si Pablo, “kay nagatuo ako sa Dios.”
Mga Buhat 27:21–25
Pila ka adlaw wala madugay, ang sakayan nasangad ug nalunod. Apan sama lamang sa gisaad sa anghel, walay usa diha sa sakayan nga mamatay. Silang tanan milangoy ngadto sa usa ka isla nga gitawag og Melita.
Mga Buhat 27:40–44; 28:1
Ang mga tawo kinsa namuyo sa Melita mga maluluy-on ngadto ni Pablo ug sa uban nga gikan sa sakayan. Nagdaob sila aron ang tanan mainitan.
Mga Buhat 28:2
Sa kalit, usa ka bitin migula gikan sa kalayo ug miukob sa kamot ni Pablo. Apan si Pablo wala masakiti. Gisawilik lamang niya ang bitin. Ang mga tawo natingala!
Mga Buhat 28:3–6
Usa ka lalaki nga ginganlan og Publio mipapuyo ni Pablo sa iyang panimalay. Ang amahan ni Publio masakiton kaayo. Mipatong si Pablo sa iyang mga kamot diha kaniya ug migamit sa gahom sa Dios sa pag-ayo kaniya.
Mga Buhat 28:7–8
Migahin og tulo ka bulan si Pablo sa Melita. Ang Ginoo mitabang kaniya sa pagbuhat og daghang mga milagro, nagpanalangin ug nag-ayo sa mga tawo kinsa masakiton. Dayon, sama lamang nga ang Ginoo misaad, mibiyahe si Pablo ngadto sa Roma.
Mga Buhat 28:9–16
Usa gihapon ka binilanggo si Pablo samtang siya didto sa Roma. Apan ang iyang mga magbalantay mitugot sa mga tawo sa pagbisita kaniya. Mitudlo si Pablo mahitungod ni Jesukristo ngadto ni bisan kinsa nga maminaw. Misulat usab siya og mga sulat ngadto sa mga miyembro sa Simbahan diha sa daghang mga dapit. Ang pipila niini nga mga sulat, o mga epistola, anaa sa Bag-ong Tugon.
Mga Buhat 28:16–31