Mahitungod sa Bag-ong Tugon

Ang Biblia adunay duha ka bahin: ang Daang Tugon ug ang Bag-ong Tugon. Ang Daang Tugon dunay mga sinulat gikan sa mga propeta sa dugay na kaayong panahon. Ang pipila niining mga propeta misulat nga ang Dios misaad nga magpadala og usa ka Manluluwas. Siya mao ang Anak sa Dios ug moluwas kanato gikan sa sala ug kamatayon aron kita makabalik og puyo kauban sa Dios.

Isaias 53:3–5; Jacob 7:11; Moises 4

Ang Bag-ong Tugon naghisgot mahitungod kon sa unsang paagi kini nga saad natuman. Naghisgot kini mahitungod sa pagkatawo ni Jesukristo, ang Anak sa Dios.

Lucas 2:4–7

Ang Bag-ong Tugon naghisgot usab mahitungod sa kinabuhi ni Jesus. Nagpuyo siya kauban sa mga Judeo ug nagtudlo kanato unsaon sa pagpakabuhi aron kita makabalik sa Langitnong Amahan sa umaabot nga adlaw.

Mateo 5:1–2

Si Jesus mipanalangin ug miserbisyo sa katawhan. Mihimo Siya og daghang milagro alang nila, sama sa pagpang-ayo sa mga tawo nga may sakit ug pagbuhi sa mga tawo nga patay na.

Mateo 4:23

Si Jesus mipili og dose sa Iyang mga sumusunod nga mahimong mga Apostoles. Gihatagan Niya sila og awtoridad sa pagpangulo sa Iyang Simbahan.

Lucas 9:1–2

Kay Siya nahigugma kanato, si Jesus midala diha sa Iyang Kaugalingon sa atong tanan nga mga kasakit, mga kasubo, ug sala. Namatay Siya alang kanato. Dayon, paglabay sa tulo ka adlaw, gibuntog Niya ang kamatayon ug nabanhaw! Si Jesukristo nabuhi ug tungod Kaniya, kitang tanan makahinulsol sa atong mga sala ug mabuhi pag-usab human kita mamatay.

Alma 7:11–13

Ang mga tawo nga nakaila ug nahigugma ni Jesus misulat sa tanan mahitungod niini. Ang Iyang mga Apostoles mihimo og mga sulat aron matabangan ang mga miyembro sa Simbahan sa paglig-on sa ilang pagtuo kang Jesukristo. Ang mga butang nga ilang gisulat natipigan sulod sa daghan kaayong katuigan. Karon mabasa ninyo kini diha sa Bag-ong Tugon ug makakat-on kon unsaon sa pagsunod si Jesukristo.

Lucas 1:1–4