Nagpuyo pinaagi sa [Hugot] nga Pagtuo diha ni Jesukristo

Kini dili kanunay nga sayon nga mahimong usa ka manununod ni Jesukristo sa unang mga panahon sa Simbahan. Usahay ang mga tawo maglagot sa mga miyembro sa Simbahan o mibugalbugal kanila tungod sa ilang mga tinuohan. Gusto ni Pablo nga motabang kanila sa paghupot sa ilang hugot nga pagtuo diha ni Jesukristo.

Mga Hebreohanon 10:32–39

Misulat si Pablo og sulat ngadto sa mga Hebreohanon, o Judeo, nga mga Santos. Iyang gitudlo nga ang [hugot] nga pagtuo nagpasabot sa pagtuo ug paglaom alang sa usa ka butang, bisan tuod kita dili makakita niini. Sama pananglit, ang pagbaton og [hugot] nga pagtuo diha ni Jesukristo nagpasabot og pagsalig Kaniya, bisan og kita wala pa makadawat sa mga panalangin nga atong gilaoman.

Mga Hebreohanon 11:1, 6

Sa pagtabang sa Hebreohanong mga Santos sa pag-atubang sa ilang mga hagit uban sa [hugot] nga pagtuo, mipahinumdom si Pablo kanila sa mga istorya mahitungod sa mga tawo diha sa mga kasulatan kinsa nagbaton og dakong [hugot] nga pagtuo.

Mga Hebreohanon 11:4–40

Sama pananglit, Si Pablo mihisgot ni Noe. Misulti ang Dios ngadto ni Noe sa pagtukod og arka sa pagluwas sa iyang pamilya gikan sa lunop. Si Noe dihay [hugot] nga pagtuo nga mosunod, bisan wala pa niya makita ang ulan.

Mga Hebreohanon 11:7

Mihisgot si Pablo mahitungod ni Abraham ug Sara, kinsa dihay [hugot] nga pagtuo sa pagbiya sa ilang panimalay tungod kay ang Ginoo misaad sa paggiya kanila ngadto sa usa ka mas maayong dapit. Sila usab dihay [hugot] nga pagtuo sa saad sa Dios nga sila makabaton og usa ka dako nga pamilya, bisan tuod sila mga tigulang ug gani wala pay mga anak.

Mga Hebreohanon 11:8–16

Mihisgot usab si Pablo mahitungod sa inahan ni Moises, si Jocabed. Siya dihay [hugot] nga pagtuo sa pagtago ni Moises, sa dihang siya usa pa ka masuso, sa pagpabilin kaniya nga luwas gikan sa usa ka daotan nga hari.

Mga Hebreohanon 11:23

Midako si Moises sa Ehipto. Siya unta mahimong adunahan ug haruhay. Apan iyang gibiyaan ang tanan niana tungod kay siya dihay hugot nga pagtuo sa Dios ug sa Iyang mga panalangin.

Mga Hebreohanon 11:24–27

Tungod sa iyang [hugot] nga pagtuo, migiya si Moises sa mga tawo sa dios paggawas sa pagkaulipon. Gani sila milakaw agi sa Pulang Dagat nga ingon og uga nga yuta!

Mga Hebreohanon 11:29

Mihisgot usab si Pablo mahitungod ni Rahab. Siya adunay [hugot] nga pagtuo sa pagtabang sa mga tawo sa Dios, bisan tuod wala nay usa sa iyang siyudad nga mituo sa Ginoo. Ang iyang hugot nga pagtuo miluwas sa iyang pamilya.

Mga Hebreohanon 11:30–31

Miingon si Pablo nga kining daghang mga ehemplo sa [hugot] nga pagtuo makatabang kanato sa pagbaton usab og [hugot] nga pagtuo diha ni Jesukristo, bisan kon ang kinabuhi malisod. Kita makahinulsol sa atong mga sala ug motan-aw ngadto ni Jesus, ang “mag-uugmad ug maghihingpit sa atong [hugot] nga pagtuo.” Siya andam sa pagpakamatay alang kanato tungod kay Siya nahibalo nga ang Iyang Pag-ula modala og hingpit nga kalipay ug pagkaayo!

Mga Hebreohanon 12:1–2