Usa ka Karnerong Nawala, usa ka Sinselyo nga Nawala, ug usa ka Anak nga Nawala

Ang pipila ka lider sa mga Judeo nakakita ni Jesus nga nakigsulti ug nakigdungan og kaon kauban sa mga tawo kinsa sa ilang hunahuna mga makasasala. Ang mga lider nagtuo nga sayop kadto nga si Jesus makigdungan og kaon sa mga makasasala. Si Jesus misugilon sa mga lider og tulo ka istorya o mga sambingay aron matabangan sila sa pagsabot nga Siya gustong motabang sa matag usa nga makahinulsol ug unsa Siya kamalipayon kon sila mohimo.

Lucas 15:1–3

Ang una mao ang sambingay mahitungod sa tawo nga dunay 100 ka karnero. Ang usa sa iyang karnero nawala.

Lucas 15:4

Ang tawo mibiya sa 99 ka mga karnero ug milakaw sa pagpangita sa usa nga nawala. Padayon siyang nangita hangtod nga iya kining nakit-an.

Lucas 15:4

Dihang sa kataposan iyang nakit-an ang karnerong nawala, nalipay kaayo siya! Iyang gipas-an pauli ang karnero ug gisultihan ang iyang mga higala ug mga silingan sa pagmaya uban kaniya. Miingon si Jesus nga ingon niini ang bation sa Langitnong Amahan kon dunay tawo nga maghinulsol sa ilang mga sala ug mobalik ngadto Kaniya.

Lucas 15:5–7

Ang ikaduhang sambingay mao ang mahitungod sa babaye nga dunay 10 ka sinselyong pilak. Dihang nawala ang usa, nagdagkot siya og kandila ug gisuhid ang iyang balay, sa pagpangita sa sinselyong nawala. Padayon siyang nangita hangtod nga iya kining nakit-an.

Lucas 15:8

Dihang sa kataposan nakit-an niya ang iyang sinselyo nga nawala, nalipay kaayo siya! Gisultihan niya ang iyang mga higala ug mga silingan sa pagmaya uban kaniya. Miingon si Jesus nga ingon niini ang bation sa mga anghel sa langit kon dunay tawo nga maghinulsol sa ilang mga sala.

Lucas 15:9–10

Ang ikatulong sambingay mao ang mahitungod sa tawo nga dunay duha ka anak nga lalaki. Ang manghod dili na ganahang mopuyo kauban sa iyang amahan. Gihangyo niya ang iyang amahan nga ihatag ang iyang bahin nga kwarta sa pamilya karon. Dayon mibiya ang anak sa balay ug miadto sa layo kaayo nga nasod.

Lucas 15:11–13

Ang anak mihimo og pipila ka ngil-ad kaayong mga pagpili. Giusikan niya ang kwarta nga gihatag kaniya sa iyang amahan.

Lucas 15:13

Human nga wala na ang iyang tanan nga kwarta, gigutom kaayo siya. Walay bisan usa nga mohatag kaniya og bisan unsang makaon. Sa kataposan nakatrabaho siya isip tiglawog sa mga baboy. Ang anak hilabihan kagutom, nangandoy nga unta mahimo siyang mokaon sa lawog sa mga baboy. Nahibalo siyang kinahanglan siya nga mobalik sa iyang amahan.

Lucas 15:14–18

Apan dili makaseguro ang anak kon dawaton ba siya sa iyang amahan og balik. Mihukom siya nga hangyoon ang iyang amahan kon pwede ba nga siya mahimong usa sa iyang mga sulugoon.

Lucas 15:17–19

Dihang ang anak naglakaw pauli sa balay, nakita siya sa iyang amahan nga nagpadulong gikan sa layo. Ang amahan nalipay kaayo, midagan siya ngadto sa iyang anak!

Lucas 15:20

Gigakos sa amahan ang iyang anak ug mihalok kaniya. Gisultihan niya ang iyang mga sulugoon sa pagdala sa labing nindot nga mga sinina alang sa iyang anak ug mag-andam og usa ka kombira. Gusto niyang ang tanan magsaulog ug maglipay tungod sa iyang anak nga mipauli na.

Lucas 15:20–24

Sa tanang panahon, kining magulang nga anak nag-ugmad sa umahan. Sa iyang pag-uli sa balay, nakadungog siya og musika ug sayaw-sayaw. Gipangutana niya ang usa ka sulugoon unsay nahitabo. Giingnan siya sa sulugoon nga ang iyang manghod nga lalaki mipauli na, mao nga nagkombira sila sa pagsaulog.

Lucas 15:25–27

Ang magulang nga anak nasuko. Ang iyang papa midapit kaniya sa kombira, apan dili siya moadto. Giingnan niya ang iyang amahan nga nagserbisyo siya kaniya sulod sa daghang katuigan, apan sukad masukad walay bisan usa nga naghatag og kombira alang niya. Giingnan siya sa amahan, “Imo ang tanan kong katigayonan,” apan maayo ang paglipay kon dunay tawo nga maghinulsol ug mopauli!

Lucas 15:28–32