Si Cornelio ug ang Iyang mga Higala Nakadawat sa Espiritu Santo––ang ebanghelyo alang sa tanan

Mga Buhat 10

Si Cornelio ug ang Iyang mga Higala Nakadawat sa Espiritu Santo

Ang ebanghelyo alang sa tanan

Si Cornelio ug ang iyang pamilya nagtabang sa usa ka tawo nga nanginahanglan.

Si Cornelio usa ka lider sa kasundalohan nga Romano. Siya ug ang iyang pamilya mituo sa Dios, apan dili sila mga Judeo ug wala mahibalo mahitungod ni Jesukristo. Nakigbahin si Cornelio kon unsay anaa kaniya ngadto sa kabus ug miampo ngadto sa Dios sa kanunay.

Mga Buhat 10:1–2

Usa ka anghel mipakita ngadto ni Cornelio.

Usa ka hapon, usa ka anghel mianha ni Cornelio samtang siya nagpuasa ug nag-ampo. Miingon ang anghel, “Cornelio, ang imong pag-ampo gidungog.” Ang Dios nakakita sa iyang kamaloloy-on. Ang anghel misulti ni Cornelio sa pagpangita ni Apostol Pedro, kinsa nagpuyo diha sa usa ka siyudad nga gitawag og Jope. Si Pedro mosulti ni Cornelio unsay buhaton.

Mga Buhat 10:3–6, 30–32

Nagsugo si Cornelio sa iyang mga sulugoon sa pagpangita ni Pedro.

Gisultihan ni Cornelio ang iyang mga sulugoon kon unsay gisulti sa anghel. Gipaadto niya sila sa Jope sa paghangyo ni Pedro sa pag-adto sa pagbisita kaniya.

Mga Buhat 10:7–8

Sa Jope, si Pedro didto sa atop sa balay nag-ampo. Gigutom siya ug hapit na molakaw aron mokaon, sa dihang sa kalit nakita niya ang usa ka panan-awon.

Mga Buhat 10:9–10

Nakita ni Pedro ang usa ka dakong habol nanaog gikan sa langit, puno sa tanang matang sa hayop ug mga langgam. Dayon nadungog ni Pedro ang usa ka tingog nga nagsulti nga siya kinahanglang mokaon niadto nga mga hayop. Apan kini mga hayop nga ang mga Judeo wala tugoti sa pagkaon. Ang balaod ni Moises miingon nga kini dili mga limpyo. Dili gusto si Pedro nga mokaon niini.

Mga Buhat 10:11–14

Nakita ni Pedro pag-usab ang panan-awon.

Ang tingog miingon nga kon ang Dios nakahimo og usa ka butang nga limpyo, kini kinahanglan nga dili tawgon og dili limpyo. Ang panan-awon gibalik sa tulo ka higayon. Nahibulong si Pedro unsa ang kahulogan niini.

Mga Buhat 10:15–17

Usa ka tingog nagsulti ni Pedro sa pagsugat sa mga sulugoon ni Cornelio.

Diha dayon, ang Espiritu misulti ni Pedro nga tulo ka tawo nangita kaniya. “Uban kanila,” miingon ang Espiritu, “tungod kay ako mipadala kanila.”

Mga Buhat 10:16–21

Si Pedro nakigsulti sa mga sulugoon ni Cornelio.

Ang tulo ka lalaki mga sulugoon ni Cornelio. Gisultihan nila si Pedro mahitungod sa anghel nga nakita ni Cornelio ug nangutana kon si Pedro moadto ba sa pagtudlo kaniya. Ang mga Judeo sa kasagaran dili mosulod sa mga panimalay sa mga tawo kinsa dili mga Judeo, ug ang Apostoles dili motudlo kanila sa ebanghelyo. Apan nahinumdom sa iyang panan-awon, mihukom si Pedro sa pag-adto.

Mga Buhat 10:22, 28

Naghimamat si Pedro ni Cornelio ug sa iyang pamilya ug mga higala.

Sa dihang miabot si Pedro, si Cornelio naghulat kaniya uban sa daghang mga higala ug mga sakop sa pamilya. Gisultihan niya si Pedro nga sila andam sa pagpaminaw sa bisan unsa ang Dios misugo kaniya sa pagsulti kanila.

Mga Buhat 10:26, 33

Nagtudlo si Pedro mahitungod ni Jesukristo.

Karon nasabtan ni Pedro unsay gitudlo sa Dios kaniya diha sa panan-awon. Gisultihan ni Pedro ang tanan nga ang Dios wala maghigugma og usa ka nasod o pundok sa mga katawhan nga labaw kay sa uban. Magdawat ang Dios sa tanan kinsa magsunod Kaniya ug magbuhat sa unsay matarong. Mitudlo si Pedro ni Cornelio ug sa iyang pamilya ug mga higala mahitungod ni Jesukristo.

Mga Buhat 10:34–43

Nagbunyag si Pedro sa pamilya ug mga higala ni Cornelio.

Samtang iyang gitudloan, ang Espiritu Santo mianha sa matag usa kinsa naminaw. Gidapit sila ni Pedro sa pagpabunyag diha sa ngalan ni Jesukristo. Nahibaloan ni Pedro nga ang tanan nga mga anak sa Dios abiabihon diha sa Simbahan ni Jesukristo. Ang ebanghelyo ni Jesukristo gisangyaw ngadto sa tanan.

Mga Buhat 10:44–48