Ang Sambingay sa Sulugoon Kinsa Dili Mopasaylo—Si Jesus nagtudlo mahitungod sa pagpasaylo

Mateo 18:21–34

Ang Sambingay sa Sulugoon Kinsa Dili Mopasaylo

Si Jesus nagtudlo mahitungod sa pagpasaylo

Gipangutana ni Pedro si Jesus og usa ka pangutana.

Usa ka adlaw, nangutana si Pedro kang Jesus og importanteng pangutana. Gusto siyang masayod kon pila ka higayon siya mopasaylo og mga tawo kon sila makasala. “Pito ka higayon?” Nangutana si Pedro. Gitubag ni Jesus ang pangutana ni Pedro pinaagi sa pagsaysay og usa ka sugilanon o sambingay.

Mateo 18:15–21

Ang usa ka sulugoon nakautang og kwarta sa hari.

Diha sa sugilanon, dunay hari nga may daghang sulugoon. Ang usa sa mga sulugoon nakautang sa hari og napulo ka libo nga kwarta. Dako kana nga kantidad!

Mateo 18:23–24

Ang sulugoon dili na gayod makabayad sa hari. Miingon ang hari nga iyang ibaligya ang sulugoon ug ang iyang pamilya aron mabayaran ang utang.

Mateo 18:25

Dihang nadungog kini sa sulugoon, miluhod siya. Mihangyo siya sa hari nga hatagan siya og dugang pa nga panahon. “Ayaw intawon ako apikiha kay mobayad ra unya ko sa tanan kong utang,” miingon siya.”

Mateo 18:26

Ang hari dunay kaluoy sa sulugoon. Mihukom siya sa pagpasaylo kaniya. Ang sulugoon wala na kinahanglana nga mobayad sa utang. Gawasnon na siyang molakaw!

Mateo 18:27

Ang sulugoon nagpabayad og kwarta gikan sa laing tawo.

Dayon ang sulugoon milakaw ug nakit-an ang usa ka tawo nga nakautang kaniya og gamayng kantidad nga kwarta. Iya dayong gibira ang tawo ug miingon, “Bayri na ko.”

Mateo 18:28

Ang tawo nangayo sa sulugoon og pasaylo.

Ang tawo miluhod. “Ayaw intawon ako apikiha kay mobayad ra unya ko sa tanan kong utang,” miingon siya.” Apan ang sulugoon wala mopasaylo kaniya. Iya noon siyang gipapriso.

Mateo 18:29–30

Gisultihan sa hari ang sulugoon mahitungod sa pagpasaylo.

Dihang nahibaloan sa hari unsay nahitabo, mihangyo siya nga makigkita sa sulugoon. Ang hari mipahinumdom sa iyang sulugoon nga siya gipasaylo sa labihan ka dako nga utang. Gisultihan niya ang iyang sulugoon nga kinahanglan usab unta nga iyang gipasaylo ang tawo nga nakautang og kwarta kaniya.

Mateo 18:31–33

Si Jesus nga nakigsulti ni Pedro mahitungod sa pagpasaylo.

Tanan kita dunay utang nga dili nato mabayaran mismo sa atong kaugalingon. Si Jesus mipasabot ngadto ni Pero nga ang Dios mopasaylo kanato, mao nga kita usab kinahanglang mopasaylo sa uban. Ug kita kinahanglang dili gayod mohunong human sa ikapito ka higayon apan kinahanglan nga kanunayng andam nga mopasaylo.

Mateo 18:22, 34–35; tan-awa usab sa Mateo 6:14; Doktrina ug mga Pakigsaad 64:9–10