Si Jesus Naghatag sa Iyang Kinabuhi alang Kanato

Human mihukom si Pilato nga si Jesus kinahanglan nga ilansang sa krus, gisultihan niya ang iyang mga sundalo sa pagpapahawa ni Jesus. Siya gibunalan nila, gilud-an Siya, gibutangan og usa ka korona sa mga tunok diha sa Iyang ulo, ug mibugalbugal Kaniya.

Marcos 15:15–20

Gipapas-an si Jesus sa mga sundalo og usa ka bug-at nga krus nga kahoy. Gidala nila si Jesus ngadto sa usa ka dapit gawas lamang sa Jerusalem nga gitawag og Golgota.

Juan 19:17

Gilansang sa mga sundalo ang mga kamot ug mga tiil ni Jesus sa krus. Si Jesus mihangyo sa Langitnong Amahan sa pagpasaylo sa mga sundalo, tungod kay sila wala makahibalo nga ang ilang gipasakitan ang Anak sa Dios.

Lucas 23:33–34; tan-awa usab ang Hubad ni Joseph Smith sa footnote 34c

Duha ka kriminal ang gilansang dungan ni Jesus nianang adlawa. Usa kanila miingon ngadto Kaniya, “Dili ba ikaw si Kristo, luwasa ang imong kaugalingon ug kami.”

Lucas 23:39

Ang lain nga kriminal miingon nga sila angay sa ilang kastigo, apan si Jesus walay nabuhat nga sayop. Mihangyo siya ni Jesus sa paghinumdom kaniya didto sa Iyang gingharian. Gisultihan siya ni Jesus nga sa dili madugay sila mag-uban didto sa kalibotan sa espiritu.

Lucas 23:40–43

Daghang mga babaye kinsa misunod ni Jesukristo mianha sa krus aron makig-uban Kaniya. Usa sa mga babaye mao ang inahan ni Jesus, si Maria. Nakita siya ni Jesus ug gisultihan si Juan, usa sa Iyang Apostoles, sa pag-atiman kan iya.

Juan 19:25–27; tan-awa usab Lucas 8:1–3; Marcos 15:40–41

Sulod sa tulo ka oras, kangitngit mitabon sa yuta. Gibati ni Jesus ang pag-inusara. Gibati Niya ingon og ang Iyang Amahan sa Langit mitalikod Kaniya.

Mateo 27:45–46

Sa kataposan, nahibalo si Jesus nga Iyang nahuman ang Iyang pag-antos. Siya miingon, “Amahan, natapos na, ang imong pagbuot natuman.” Dayon giduko ni Jesus ang Iyang ulo ug gihatag ang Iyang kinabuhi. Sa pagmatuod kon Siya tinuod nga namatay, usa ka sundalo miduslak sa kilid Niya gamit ang bangkaw.

Hubad ni Joseph Smith, Mateo 27:54 (sa Mateo 27:50, footnote a); Juan 19:28–30, 34

Sa dihang namatay si Jesus, ang yuta mikurog. Ang dagkong mga bato nangadugmok. Ang tabil sa templo, ang kurtina nga nagtabon sa labing balaang dapit sa templo, natunga sa pagkagisi.

Mateo 27:51

Ang mga sundalo nangahadlok. “Sa pagkatinuod kini mao ang Anak sa Dios,” miingon sila.

Mateo 27:54

Giputos sa mga disipulo ni Jesus ang Iyang lawas sa panapton ug gipahimutang Siya sa usa ka lubnganan diha sa usa ka tanaman. Wala madugay, ilang giligid ang usa ka dakong bato diha sa atubangan sa pultahan sa lubnganan.

Mateo 27:57–61; Juan 19:38–41