Gibuhi og Balik ni Jesus si Lazaro

“Ako mao ang pagkabanhaw, ug ang kinabuhi”

Sila si Maria, Marta, ug Lazaro nagpuyo sa siyudad nga gitawag og Betania. Mituo sila ni Jesus, ug Siya nahigugma kanila. Si Maria ug si Marta mga igsoon ni Lazaro.

Juan 11:1, 5

Labihan kagrabe ang sakit ni Lazaro. Si Jesus naa sa laing siyudad. Si Maria ug si Marta mipadala kaniya og mensahe aron Siya mahibalo nga ang iyang higala nasakit.

Juan 11:1–3

Miingon si Jesus nga Iyang buhion si Lazaro.

Si Jesus naghulat sulod sa duha ka adlaw. Dayon gisultihan niya ang Iyang mga disipulo nga mangadto sila sa Betania. Nabalaka ang mga disipulo tungod kay ang pipila ka tawo nga duol sa Betania gustong mopasakit ni Jesus. Apan si Jesus gustong motabang ni Lazaro. Miingon si Jesus nga patay na si Lazaro, ug miingon nga Iyang buhion siya og balik.

Juan 11:6–16

Si Marta nakahimamat ni Jesus sa gawas sa siyudad. Miingon siya nga kon si Jesus ning-adto pa og sayo, si Lazaro dili unta mamatay. Si Jesus misaad nga si Lazaro mabuhi og balik.

Juan 11:17–24

Miingon si Jesus, “Ako mao ang pagkabanhaw, ug ang kinabuhi.” Gipangutana niiya si Marta kon siya mituo ba Kaniya. Miingon siya, “Mituo ako nga ikaw ang Mesiyas, ang Anak sa Dios.”

Juan 11:25–27

Mibalik si Marta sa balay ug gisultihan si Maria nga naa na si Jesus. Miabot si Maria ug miyukbo sa tiilan ni Jesus, nga naghilak tungod sa iyang igsoon. Mihilak usab si Jesus. Pinangga niya si Lazaro, Maria, ug si Marta.

Juan 11:28–36

Miadto si Jesus sa langob diin gilubong si Lazaro.

Sila si Jesus, Marta, Maria, ug uban pa nangadto sa langob diin gilubong si Lazaro. Usa ka dakong bato giali sa agianan. Miingon si Jesus kuhaa ninyo ang bato.

Juan 11:38–39

Si Jesus mihangyo ni Marta sa pagtuo Kaniya.

Apan gisultihan ni Marta si Jesus nga upat na ka adlaw nga patay si Lazaro. Gipahinumdoman ni Jesus si Marta bahin sa Iyang saad. Gihangyo Niya siya nga motuo.

Juan 11:39–40

Gisultihan ni Jesus si Lazaro sa paggula.

Dayon nag-ampo si Jesus sa Iyang Amahan. Nagpasalamat Siya sa Dios sa Iyang kanunay nga pagpaminaw Kaniya. Gusto ni Jesus nga ang mga tawo motuo nga ang Dios mipadala Kaniya aron mahimo nga Manluluwas. Dayon mitawag si Jesus, “Lazaro, gula ngari.”

Juan 11:41–43

Si Lazaro migawas gikan sa langob. Nakaputos gihapon siya og mga sapot ug mga habol sa iyang paglubong. Giingnan ni Jesus ang mga tawo sa pagtangtang sa iyang mga putos. Daghan sa mga tawo nga nagtan-aw nianang adlawa mituo nga si Jesus mao gayod ang Manluluwas, ang Anak sa Dios.

Juan 11:44–45