Mateo 12:1–12; Lucas 13:10–17
Si Jesus Miayo sa usa ka babaye atol sa Igpapahulay
Naghimo og maayo sa Iyang balaan nga adlaw
Si Jesus ug ang Iyang mga disipulo naglakaw tabok sa umahan sa adlawng Igpapahulay. Gigutom sila, mao nga namupo sila og pipila ka trigo ug gikaon kini. Ang pipila sa mga lider sa Judeo nga gitawag og mga Pariseo nakakita kanila. Ang mga Pariseo mihimo og daghang lagda mahitungod sa adlawng Igpapahulay. Ang pagpamupo og trigo supak sa ilang mga lagda.
Mateo 12:1–2
Ang mga Pariseo nangutana ni Jesus nganong ang Iyang mga disipulo wala motahod sa Igpapahulay. Mitubag si Jesus nga wala siyay gihimo nga sayop. Gihatag sa Dios ang adlawng Igpapahulay sa pagpanalangin kanato, dili aron himoong mas lisod ang atong kinabuhi.
Mateo 12:2–8; Marcos 2:27
Sa wala madugay, si Jesus nagtudlo didto sa sinagoga atol sa adlawng Igpapahulay. May namatikdan si Jesus nga usa ka babaye didto. Dili siya makabarog og tarong. 18 ka tuig na niya kini nga giantos.
Lucas 13:10–12
Gihangyo ni Jesus ang babaye nga mopaduol Kaniya. Iyang gipatong ang Iyang mga kamot sa pagpanalangin kaniya.
Lucas 13:12–13
Dihadiha dayon, nakabarog og tarong ang babaye. Ang lider sa sinagoga nasuko tungod kay nang-ayo si Jesus sa Igpapahulay.
Lucas 13:13–14
Miingon si Jesus nga ang pag-ayo niini nga babaye mao ang hustong butang nga buhaton. Husto ang paghimo og maayo atol sa Igpapahulay. Naulaw ang lider, ug ang mga tawo sa sinagoga nagmaya tungod kay ang babaye naayo.
Lucas 13:15–17; tan-awa usab sa Lucas 6:9