Mga Anghel Mibisita ni Maria ug ni Jose

Gipili nga Moamuma sa Anak sa Dios

Usa ka babaye nga ginganlan og Maria nagpuyo sa lungsod sa Nazaret. Gihigugma niya ang Dios ug mituman sa Iyang mga sugo. Si Maria minyoonon sa usa ka tawo nga ginganlan og Jose, nga nahigugma usab sa Dios.

Mateo 1:18–19; Lucas 1:26–28

Ang anghel nga si Gabriel nga nagbisita ni Maria.

Usa ka adlaw, usa ka anghel nga ginganlan og Gabriel mibisita ni Maria. Sa sinugdanan, nahadlok si Maria. Apan miingon si Gabriel nga gipadala siya gikan sa Dios. Si Maria dili angayang mahadlok. Miingon siya nga si Maria labihan ka espesyal sa Dios ug duna na unyay anak. Ang anak ni Maria mamahimo nga Anak sa Dios, si Jesus.

Lucas 1:26–33

Ang anghel nga nagsulti kang Maria nga makabaton unya siya og anak.

Apan naglibog si Maria. Wala pa siya makasal ni Jose. Unsaon niya pagkabaton og anak? Mipasabot si Gabriel nga mahitabo kini pinaagi sa gahom sa Dios. Miingon siya kaniya, “Alang sa Dios walay dili mahimo.”

Lucas 1:34–37

Si Maria nga nagsulti sa anghel nga andam siya nga mahimong inahan sa Anak sa Dios.

Si Maria mapaubsanon ug matinud-anon. Gisultihan niya si Gabriel nga siya sulugoon sa Ginoo. Andam siya nga mahimong inahan sa Anak sa Dios.

Lucas 1:38

Si Jose nga nakahibalo nga si Maria makabaton og anak.

Dihang nahibaloan ni Jose nga si Maria makabaton og anak, naglibog siya. Naghunahuna siya kon makigminyo ba gihapon siya ni Maria.

Mateo 1:19

Apan usa ka gabii sa damgo, ang anghel mibisita ni Jose. Miingon ang anghel ngadto ni Jose nga ang anak ni Maria mao ang Anak sa Dios ug si Jose mongalan gayod Kaniya og Jesus. Si Jesus moluwas sa tanang tawo gikan sa ilang mga sala. Miingon ang anghel nga si Jose makigminyo gayod gihapon ni Maria.

Mateo 1:20–23

Gihimo ni Jose unsay gisulti sa anghel. Si Jose ug Maria nagminyo.

Mateo 1:24

Si Maria nga nagbisita sa iyang ig-agaw nga si Elisabet.

Si Maria miadto sa pagbisita sa iyang ig-agaw nga si Elisabet. Giingnan si Maria sa anghel nga si Elisabet nagsabak usab, bisan og tigulang na kaayo siya. Usa kini ka lain pa nga milagro gikan sa Dios. Ang iyang anak nga lalaki magtubo nga mahimong si Juan nga Magbubunyag. Dihang misulod si Maria sa balay, gitimbaya niya si Elisabet.

Lucas 1:13–17, 36, 39–40

Diha dayon nga si Elisabet nakadungog ni Maria, ang bata sulod sa tiyan ni Elisabet milukso sa kalipay. Si Elisabet napuno sa Espiritu Santo. Nasayod siya nga si Maria nagsabak sa Anak sa Dios. Si Maria nagmaya kauban ni Elisabet. Midayeg siya sa Dios alang sa tanang talagsaon nga butang nga Iyang gihimo sa pagpanalangin sa Iyang mga anak.

Lucas 1:41–55