Gipakaon ni Jesus ang Liboan ka Tawo

Siya ang Pan sa Kinabuhi

Si Jesus nga migahin og panahon nga nag-inusara.

Nahibaloan ni Jesus nga si Juan Bautista gipatay. Miadto siya sa usa ka dapit nga layo gikan sa kalungsoran aron duna Siyay mga panahon nga mag-inusara.

Mateo 14:13

Si Jesus nga nakigsulti sa pundok sa katawhan.

Dihang nadunggan sa mga tawo kon asa na si Jesus, sila misunod Kaniya. Nakita sila ni Jesus, ug gibati Niya ang gugma alang kanila. Iyang gigahin ang tibuok adlaw sa pagpang-ayo kanila.

Mateo 14:13–14

Si Jesus nga naghangyo sa mga Apostoles nga hatagan ang mga tawo og makaon.

Sa hapit na matapos ang adlaw, gipanggutom na ang mga tawo. Ang mga Apostoles nagtuo nga paadtoon ni Jesus og balik ang mga tawo ngadto sa mga kalungsoran aron makakuha og pagkaon. Apan gusto si Jesus nga magpabilin sila. Gihangyo niya ang mga Apostoles nga hatagan ang mga tawo og makaon.

Mateo 14:15–16

Si Andres nakakita og batang lalaki nga dunay gamay nga pagkaon.

Si Apostol Andres nakakita og usa ka batang lalaki nga dunay lima ka piraso nga pan ug duha ka gagmayng isda nga ikahatag ngadto sa mga tawo. Apan adunay 5,000 ka tawo, pun-an pa sa mga babaye ug mga bata, nga kinahanglang makakaon. Unsaon kaha nila sa pagpakaon ang daghan kaayong tawo pinaagi sa gamay kaayong pagkaon?

Mateo14:17, 21; Juan 6:8–10

Si Jesus nag-ampo ug mipanalangin sa pagkaon.

Gihangyo ni Jesus ang mga Apostoles sa pagdala sa pagkaon ngadto Kaniya. Giingnan niya ang mga tawo nga manglingkod sa kasagbotan. Dayon militok si Jesus og usa ka pag-ampo sa pagpasalamat sa Langitnong Amahan alang sa pan ug sa isda ug sa pagpanalangin niini. Dayon gipikaspikas niya ang pan ug ang isda ngadto sa pirapiraso.

Mateo 14:18–19; Juan 6:10–11

Ang mga Apostoles mihatag sa pagkaon ngadto sa mga tawo.

Gisugo ni Jesus ang Iyang mga Apostoles sa paghatag sa pan ug sa isda ngadto sa mga tawo. Ang tanan mikaon, ug ang tanan nangabusog. Human nga silang tanan nakakaon, aduna pa gihapoy 12 ka basket nga puno sa nahibilin nga pagkaon!

Mateo 14:20; Juan 6:11–13

Ang mga tawo namalik, nga nangita og dugang pa nga pagkaon.

Pagkasunod adlaw, ang mga tawo namalik ug nakita na usab si Jesus. Apan nasayod si Jesus nga daghan kanila nagsunod lamang Kaniya tungod kay Siya mihatag kanila og pagkaon. Gipahinumdoman sila ni Jesus nga ang pagkaon molungtad lamang sa mubo nga panahon. Aduna pa Siyay mas maayo nga butang nga ikahatag kanila.

Juan 6:14, 24–27

Si Jesus nagtudlo nga Siya ang Pan sa Kinabuhi.

Miingon si Jesus, “Ako ang pan sa kinabuhi.” Ang pan maghatag kanato og kinabuhi dinhi sa yuta. Apan si Jesukristo makahatag kanato og kinabuhing dayon uban sa Langitnong Amahan.

Juan 6:35–58

Nasagmuyo ang mga tawo sa unsay gitudlo ni Jesus.

Daghang tawo ang wala makagusto unsay gitudlo ni Jesus. Nanglakaw sila ug mihukom nga dili na mosunod ni Jesus.

Juan 6:60, 66

Gisultihan ni Pedro si Jesus nga ang mga Apostoles dili mobiya Kaniya.

Dayon gisultihan ni Jesus ang Iyang mga Apostoles, “Mobiya ba usab kamo kanako?” Mitubag si Pedro, “Ginoo, kinsa may among kapaingnan? anaa kanimo ang mga pulong nga naghatag ug kinabuhing walay kataposan.” Ang mga Apostoles wala mobiya. Nasayod sila nga si Jesukristo mao ang Manluluwas ug ang Anak sa Dios.

Juan 6:67–69