Apostoles ni Jesus Nangulo sa Iyang Simbahan

Human si Jesus mibalik ngadto sa Iyang Amahan sa Langit, ang Apostoles mao ang mga lider sa Simbahan. Mitudlo sila sa ebanghelyo sa Manluluwas, midapit sa mga tawo sa pagpasakop sa Iyang Simbahan, ug mihimo og daghang mga milagro uban sa gahom sa Dios. Misaad si Jesus sa pagtabang kanila pinaagi sa pagpadala sa Espiritu Santo.

Mga Buhat 1:8–13; 2:41–47

Tungod kay si Judas namatay, dihay napulo og usa na lamang ka Apostoles. Giampo sa Apostoles nga mahibalo kon kinsa ang gusto sa Dios nga mopuli ni Judas ug mahimong talagsaong saksi ni Jesukristo. Gipili sa Dios ang usa ka tawo nga ginganlan og Matias. Nahimo siya nga usa sa Napulog Duha ka Apostoles.

Mga Buhat 1:15–26

Diha sa usa ka espesyal nga pista opisyal sa mga Judeo, ang mga disipulo nanag-uban didto sa Jerusalem. Sa kalit, kini ingon og usa ka hangin gikan sa langit nga mipuno sa balay. Nakita nila ang hayag sama sa kalayo nga nagpatong diha kanila, ug tanan sila napuno sa Espiritu Santo. Tungod sa Espiritu Santo, sila makasulti og ubang mga pinulongan.

Mga Buhat 2:1–4

Sa dihang ang mga tawo sa Jerusalem nakadungog mahitungod niini, usa ka dakong pundok sa katawhan nanagtigom. Bisan tuod ang mga tawo diha sa pundok gikan sa daghang mga nasod ug namulong sa nagkalainlaing mga pinulongan, sila matag usa nakadungog kon unsay gisulti sa Apostoles diha sa ilang kaugalingon nga pinulongan. Ang katawhan natingala!

Mga Buhat 2:5–13

Mibarog ug namulong si Pedro ngadto sa pundok sa katawhan. Misulti siya kanila mahitungod ni Jesukristo. Mihatag siya sa iyang pagpamatuod nga si Jesus mao ang Manluluwas ug nabanhaw.

Mga Buhat 2:14–36

Sa dihang ang mga tawo nakabati niini, gibati nila ang panginahanglan sa pag-usab. Gipangutana nila ang Apostoles unsa ang kinahanglan nilang buhaton.

Mga Buhat 2:37

Miingon si Pedro, “Paghinulsol kamo, ug magpabunyag kamo ang matag usa kaninyo sa ngalan ni Jesukristo tungod sa kapasayloan sa inyong mga sala ug madawat ninyo ang gasa sa Espiritu Santo.” Mga 3,000 ka tawo ang nabunyagan ug mipasakop sa Simbahan nianang adlawa.

Mga Buhat 2:38–43

Wala madugay, si Pedro ug si Juan miadto sa templo. Nakakita sila og usa ka lalaki kinsa dili makalakaw. Siya milingkod diha kada adlaw, mangayo sa mga tawo og salapi.

Mga Buhat 3:1–2

Ang lalaki nangayo ni Pedro ug ni Juan og salapi. Sila mihunong ug mitan-aw diha kaniya. Miingon si Pedro, “Tan-aw kanamo.”

Mga Buhat 3:3–4

Miingon si Pedro nga sila walay pilak o bulawan. Apan sila adunay usa ka butang nga mas maayo. “Sa ngalan ni Jesukristo nga Nazaretnon,” siya miingon, “tindog ug lakaw.” Si Pedro mitabang kaniya sa pagtindog. Sa unang higayon sa iyang kinabuhi, ang lalaki nakalakaw! Hilabihan niya sa kalipay nga siya milukso ug milakaw ngadto sa templo uban ni Pedro ug ni Juan.

Mga Buhat 3:6–8

Ang katawhan natingala. Misulti si Pedro kanila nga kini dili ang iyang gahom o gahom ni Juan nga miayo sa lalaki. Siya naayo pinaagi sa gahom ni Jesukristo ug hugot nga pagtuo diha Kaniya. Misulti si Pedro kanila sa paghinulsol ug sa motuo ni Jesus.

Mga Buhat 3:9–26

Ang pipila sa mga lider sa mga Judeo wala makagusto sa unsay gitudlo ni Pedro ug ni Juan. Miingon sila walay usa nga gitugotan sa pagtudlo mahitungod ni Jesus.

Mga Buhat 4:1–18

Miingon si Pedro ug si Juan nga sila mosunod sa Dios, ug ang Dios buot kanila nga mosulti sa mga tawo kon unsa ang ilang nahibaloan mahitungod ni Jesukristo.

Mga Buhat 4:19–20

Ang Apostoles mipadayon sa pagtudlo sa ebanghelyo sa Manluluwas uban sa dakong gahom. Daghan ug nagkadaghan nga mga tawo ang mipasakop sa Simbahan. Silang napuno uban sa Espiritu. Naghigugmaay sila ug nakigbahin sa tanan. Ilang gibaligya kon unsay aduna sila ug gihatag ang salapi ngadto sa Apostoles aron ihatag ngadto sa kabus.

Mga Buhat 4:31–37