Ang Bata nga si Jesus

Si Jesus nagtubo sa lungsod sa Nazaret kauban ni Maria ug ni Jose. Paglabay sa panahon, nakakat-on siya og mas daghan pa mahitungod sa Langitnong Amahan. Nangandam Siya alang sa buhat nga gusto sa Langitnong Amahan nga Iyang buhaton.

Lucas 2:39–40; Doktrina ug mga Pakigsaad 93:12–14

Dihang 12 anyos na si Jesus, miadto siya sa Jerusalem kauban sa pamilya ug mga higala sa pagsaulog sa Pagsaylo. Nagpabilin sila didto sulod sa pipila ka adlaw.

Lucas 2:41–43

Sa ilang pagpamauli, si Jose ug Maria nakamatikod nga si Jesus wala mauban kanila. Namalik sila sa Jerusalem sa pagpangita Kaniya. Nabalaka kaayo sila.

Lucas 2:44–46

Human sa pagpangita sulod sa tulo ka adlaw, sa kataposan nakit-an ni Maria ug Jose si Jesus. Didto siya sa templo, nakigsulti sa pipila ka mga magtutudlo mahitungod sa mga kasulatan. Ang mga magtutudlo nangutana Kaniya og mga pangutana. Natingala sila sa ka daghan sa nahibaloan ug nasabtan ni Jesus!

Lucas 2:46–47

Gisultihan ni Maria si Jesus unsa kadako ang ilang kabalaka dihang wala nila siya makit-i. Si Jesus miingon nga naghimo Siya sa buluhaton sa Iyang Langitnong Amahan. Si Jesus mibalik ngadto sa Nazaret kauban sa Iyang pamilya. Mituman Siya ni Maria ug ni Jose.

Lucas 2:48–52

Si Jesus padayon sa pagkat-on. Nagkadako Siya ug nagkakusgan. Gihigugma Siya sa Langitnong Amahan ug gitabangan Siya nga maandam alang sa Iyang misyon. Gihigugma ni Jesus ang mga tawo sa Iyang palibot, ug sila nahigugma Kaniya.

Lucas 2:52