Marcos 10:17–31
Jesus ug ang Batan-ong Dato
“Unsa may kinahanglan nakong buhaton aron madawat ko ang kinabuhing dayon?”
Samtang si Jesus ug ang Iyang mga disipulo nagbiyahe, usa ka batan-ong dato nagdagan paingon ni Jesus ug miluhod sa Iyang atubangan. Nangutana siya ni Jesus unsay angay niyang buhaton aron makapuyo uban sa Langitnong Amahan pag-usab.
Marcos 10:17
Ang Manluluwas mipahinumdom sa batan-on nga nakahibalo na siya sa mga sugo sa Dios: ayaw pagpatay, ayaw pamakak o pangawat, ug tahora ang imong amahan ug inahan.
Marcos 10:19
Ang batan-on mitubag nga misunod siya kanunay niini nga mga sugo, sukad pa sa iyang pagkabata.
Marcos 10:20
Gitan-aw ni Jesus ang batan-on uban sa gugma. Gisultihan niya siya nga kinahanglan niya nga mobuhat og usa pa ka butang. Kinahanglan niyang ibaligya ang tanan niyang gipanag-iya, ihatag ang kwarta ngadto sa kabos, ug mahimong usa sa mga sumusunod ni Jesus. Dayon siya makabaton og bahandi sa langit!
Marcos 10:21
Ang batan-on dato kaayo. Dili siya gusto nga ihatag ang tanan nga iyang gipanag-iya. Milakaw siya nga mibati og kasubo.
Marcos 10:22
Miingon si Jesus nga mas sayon pa sa usa ka kamelyo ang paglusot sa lungag sa dagom kay sa pagsulod sa usa ka dato ngadto sa gingharian sa Dios. Ang mga disipulo nasurpresa. “Kinsa ra man diay ang maluwas?” nangutana sila. Gipasabot ni Jesus nga kinahanglan kitang mosalig sa Dios aron maluwas. “Dili kini mahimo sa tawo apan mahimo sa Dios kay ang tanan mahimo gayod sa Dios.” miingon Siya
Marcos 10:23–30