“Gihimo Ninyo Kini alang Kanako”

Misulti si Jesukristo sa Iyang mga disipulo nga human Siya makabalik ngadto sa Iyang Amahan sa Langit, Siya mobalik nganhi sa yuta uban sa tanang balaan nga mga anghel. Nianang adlawa, ang mga tawo gikan sa tanang kanasoran magpundok sa Iyang atubangan —mga tawo kinsa misunod Kaniya ug mga tawo nga wala mosunod.

Mateo 25:31–33

Sultihan ni Jesus ang mga tawo nga misunod Kaniya nga makasulod sila sa Iyang gingharian, tungod kay sa dihang gigutom Siya, mipakaon sila Niya. Sa dihang giuhaw Siya, mihatag sila Kaniya og mainom.

Mateo 25:34–35

Mihatag sila Kaniya og mga sinina ug dapit nga kapuy-an sa dihang nagkinahanglan Siya niini. Sa dihang nagmasakiton Siya o anaa sa prisohan, mibisita sila Kaniya.

Mateo 25:36

Ang mga tawo mangutana ni Jesus kanus-a sila sukad mihimo niini nga mabination nga mga butang alang Kaniya. Ang Manluluwas mopasabot nga kon kita mohimo sa mabination nga mga butang alang sa ubang tawo, sama ra kini nga kita naghimo og mabinationg mga butang alang Kaniya.

Mateo 25:37–40

Si Jesus mosulti ngadto sa mga tawo nga wala mosunod Kaniya nga dili sila makasulod sa Iyang gingharian. Sa dihang gigutom ug giuhaw Siya, wala sila mohatag Kaniya og pagkaon ug mainom.

Mateo 25:41–42

Wala sila motabang Kaniya sa dihang nagkinahanglan Siya og mga sinina o dapit nga kapuy-an. Sa dihang Siya nasakit o napriso, wala sila mobisita Kaniya.

Mateo 25:43

Si Jesus mopasabot nga kon kita mopili nga dili motabang sa usa ka tawo nga nanginahanglan, nagpili kita nga dili motabang Kaniya. Kon kita mopili sa pagtabang sa uban, kita nagpili sa pagtabang ni Jesus.

Mateo 25:45