Ang Panihapon sa Ginoo

Si Jesus ug ang Iyang mga Apostoles didto sa Jerusalem aron sa pagsaulog sa Pagsaylo. Ang Judeo nga mga tawo misaulog sa Pagsaylo matag tuig. Nakatabang kini nila nga mahinumdom nga, sa daghang katuigan nga milabay, ang ilang mga pamilya mga ulipon sa Ehipto, ug ang Dios mitabang nila nga makaeskapo.

Exodo 12:27

Samtang didto sila sa Jerusalem, si Jesus ug ang Iyang Apostoles adunay gihimo sa espesyal nga kasaulogan. Si Jesus nagpaabot nga mopaambit niini nga pagkaon uban nila.

Lucas 22:7–15

Human sila makapangaon, gisudlan ni Jesus ang panaksan og tubig. Nagsugod siya sa paghugas sa mga tiil sa Iyang Apostoles.

Juan 13:4–5

Sa dihang turno na ni Pedro, nangutana siya nganong gibuhat kini ni Jesus. Ang paghugas sa mga tiil usa ka butang nga sa kasagaran buhaton lamang sa mga sulugoon.

Juan 13:6

Miingon si Jesus nga Siya naghugas sa ilang mga tiil aron sa pagpakita og ehemplo alang kanila. Gusto Siya nga sila moserbisyo ug mahigugma sa usag-usa sama nga Siya nahigugma kanila. Kon buhaton nila kini, ang mga tawo masayod nga sila Iyang mga disipulo.

Juan 13:14–16, 34–35

Gisultihan ni Jesus ang Iyang mga disipulo nga Siya mamatay sa dili madugay. Miingon si Pedro nga siya andam nga mamatay alang ni Jesus.

Juan 13:36–38

Apan si Jesus nakahibalo nga moabot ang lisod nga mga panahon. Giingnan niya si Pedro nga sa dili pa motuktugaok ang manok pagkasunod buntag, si Pedro moingon sa tulo ka higayon nga Siya wala makaila ni Jesus.

Juan 13:38

Nakahibalo si Jesus nga ang Iyang Apostoles mabalaka ug mahadlok. Misaad Siya nga ang Dios mopadala kanila sa Espiritu Santo. Ang Espiritu Santo mohupay nila, motudlo nila, ug motabang nila nga mahinumdom unsa ang gitudlo ni Jesus kanila. Giingan Niya sila nga dili maguol o mahadlok. “Kon kamo nahigugma kanako, tumana ninyo ang akong mga sugo.”

Juan 14:1, 15–16, 26–27

Dayon mibuhat og butang si Jesus nga espesyal kaayo aron sa pagtabang sa Iyang Apostoles nga mahinumdom Kaniya kanunay. Gihatag Niya kanila ang sakramento. Una, gipanalanginan Niya ang pan, gipikas-pikas kini, ug gihatag kini ngadto sa Iyang Apostoles. Gisultihan sila ni Jesus sa paghunahuna sa Iyang lawas kon sila mokaon sa pan. Gisugo Niya sila sa paghinumdom nga Siya magpakamatay alang kanila.

Mateo 26:26; Lucas 22:19

Dayon gibubo ni Jesus ang bino ngadto sa kopa. Gipanalanginan Niya ang bino ug misulti sa Apostoles sa pag-inom niini. Gisultihan sila ni Jesus sa paghunahuna sa Iyang dugo kon sila moinom sa bino. Gisugo Niya sila sa paghinumdom nga Siya mag-antos, magdugo, ug mamatay tungod sa kasakit ug mga sala sa tanang tawo aron nga kita makahinulsol ug mapasaylo.

Mateo 26:27–28; Lucas 22:20

Dayon si Jesus mipasabot nga Siya sama sa usa ka punoan, ug ang Iyang mga disipulo sama sa mga sanga. Kon ang usa ka sanga magpabilin nga konektado sa punoan, mobunga kini. Ang usa ka sanga nga dili konektado sa punoan mamatay ug dili mamunga Gusto ni Jesus nga ang Iyang mga disipulo nga magpabilin nga suod ngadto Kaniya pinaagi sa paghigugmaay sa usag-usa ug sa pagtuman sa Iyang mga sugo.

Juan 15:4–12

Human nagtudlo niining mga butanga, si Jesus ug ang Iyang Apostoles mikanta og himno. Naglakaw sila paingon sa tanaman nga gitawag og Getsemani.

Mateo 26:30