Jesus sa Getsemani

Si Jesus ug ang Iyang Apostoles miadto ngadto sa usa ka tanaman nga gitawag og Gesemani. Si Jesus mihangyo ni Pedro, Santiago, ug Juan sa pagsunod Kaniya ug misulti sa uban sa paghulat.

Mateo 26:36–37; Juan 18:1

Si Jesus misulti ni Pedro, Santiago, ug Juan nga gibati Niya ang hilabihang kaguol. Mihangyo Siya Kanila sa pagpabilin nga magmata samtang Siya mag-ampo.

Mateo 26:38

Dayon si Jesus milakaw layo pa og gamay ngadto sa tanaman. Misugod Siya sa pag-antos alang sa atong mga sala aron kita makahinulsol ug mapasaylo. Gibati usab ni Jesus ang atong tanan nga mga sakit, balatian, ug kaguol aron Siya mahibalo kon unsaon sa pagtabang kanato. Siya mihimo niini tungod kay Siya nahigugma kanato. Tanan niini kabahin sa plano sa Langitnong Amahan.

Mateo 26:39; Lucas 22:41; Mga Taga-Roma 3:23; Alma 7:11–13; 3 Nephi 27:19

Ang pag-antos ni Jesus hilabihan sa kasakit nga Siya mihangyo sa Langitnong Amahan kon mahimo ba Niyang kuhaon ang pag-antos. Apan Siya andam sa pagbuhat unsa ang gikinahanglan sa Iyang Amahan Kaniya nga buhaton. Siya miingon, “Dili ang akong pagbuot maoy matuman kondili ang imo.”

Lucas 22:42

Miadto si Jesus ni Pedro, Santiago,ug Juan ug nakita nga sila nangatulog. Gipukaw Niya sila ug mihangyo kanila pag-usab sa pagpabilin nga magmata ug mag-ampo. Apan siya nahibalo nga bisan tuod sila gustong magpabilin nga magmata, sila kapoy kaayo.

Mateo 26:40–41

Si Jesus nag-ampo pag-usab. Usa ka anghel miabot sa paghatag Kaniya og kalig-on. Gibati Niya ang hilabihan nga kasakit, ug busa Siya nag-ampo og mas maayo. Ang Iyang singot mga tinulo sa dugo nga nahulog ngadto sa yuta.

Mateo 26:42; Lucas 22:43–44; Mosiah 3:7; Doktrina ug Mga Pakigsaad 19:16–19

Duha pa ka higayon, si Jesus miadto ni Pedro, Santiago ug Juan. Sa kataposan, gipukaw Niya sila, tungod kay ang panahon miabot na nga Siya pagakuhaon.

Mateo 26:43–46