Si Jesus Nagtudlo mahitungod sa Yuta, mga Liso, Pan, ug mga Perlas—Yanong mga istorya nga makatabang nato sa pagsabot sa espirituhanong mga kamatuoran

Mateo 13

Si Jesus Nagtudlo mahitungod sa Yuta, mga Liso, Pan, ug mga Perlas

Yanong mga sugilanon nga makatabang nato sa pagsabot sa espirituhanong mga kamatuoran

Si Jesus nga nagtudlo gikan sa usa ka sakayan samtang ang mga tawo naminaw.

Si Jesus sa kasagaran mosugilon ug mga istorya nga gitawag og mga sambingay. Diha sa mga sambingay, gikompara ni Jesus ang komon, matag adlaw nga mga butang ngadto sa importanteng mga kamatuoran mahitungod sa Iyang ebanghelyo. Aron makasabot sa mga sambingay, ang Iyang mga sumusunod kinahanglang maminaw pag-ayo ug maghunahuna gayod mahitungod sa kahulogan niini. Ang mga sambingay nagtabang kanila sa pagkat-on mahitungod sa gingharian sa Dios.

Mateo 13:3, 10–15

Gisugdan ni Jesus og usa ka sambingay mahitungod sa usa ka tawo nga nagtanom og pipila ka liso.

Sa usa ka sambingay, ang tawo miadto sa umahan aron magtanom og pipila ka liso. Nagsabwag siya og daghan kaayong liso libot sa umahan. Ang mga liso nangatagak ngadto sa managlahi nga matang sa yuta.

Mateo 13:3

Pipila sa mga liso nga nangahulog ngadto sa gahi nga bahin sa dalan.

Ang pipila sa mga liso nangahulog ngadto sa gahi nga bahin sa yuta, diin dili gayod kini makatubo. Nangabot ang mga langgam ug mituka sa mga liso nga nangahulog didto.

Mateo 13:4

Pipila sa mga liso nga nangahulog ngadto sa batoon nga yuta.

Pipila ka mga liso nangahulog ngadto sa batoon nga yuta. Ang mga liso dali kaayong mitubo, apan ang mga gamot dili makatubo tungod sa mga bato. Dihang miabot ang ting-init, nangamatay ang mga tanom.

Mateo 13:5-6

Pipila sa mga liso nga nangahulog ngadto sa yuta nga puno sa mga sagbot.

Ang pipila ka mga liso nangahulog ngadto sa yuta nga puno sa tunokon nga mga sagbot. Tungod sa tunokon nga mga sagbot, ang mga liso dili makatubo.

Mateo 13:7

Ang pipila ka mga liso nga mitubo ngadto sa lig-ong mga tanom.

Ang ubang mga liso nahulog ngadto sa maayo nga yuta. Nahimo silang lig-on, himsog nga mga tanom. Namunga kini og daghan.

Mateo 13:8

Mipasabot si Jesus nga ang mga liso susama sa pulong sa Dios.

Aron matabangan ang Iyang mga disipulo sa pagsabot, gipasabot ni Jesus unsay ipasabot sa sambingay. Ang mga liso susama sa pulong sa Dios. Ang managlahing matang sa yuta susama sa kasingkasing sa mga tawo ug sa managlahing pamaagi nga sila mosanong sa pagpaminaw sa pulong sa Dios. Ang maayo nga yuta susama sa mga tawo nga mamati sa pulong sa Dios, mosabot niini, ug motuman niini.

Mateo 13:18–23

Si Jesus nagtudlo mahitungod sa liso sa mustasa.

Sa pagtudlo mahitungod kon unsaon nga motubo ang gingharian sa Dios, gisugilon ni Jesus ang mahitungod sa liso sa mustasa. Gamay kaayo kini, apan motubo kini ngadto sa usa ka kahoy diin ang mga langgam makapuyo.

Mateo 13:31–32

Si Jesus nga nagtudlo mahitungod sa pan ug sa igpapatubo [yeast].

Si Jesus miingon usab nga ang gingharian sa Dios susama sa pangpaalsa o igpapatubo nga gamiton sa usa ka babaye kon maghimo og pan. Nagkinahanglan ra kini og gamay kaayo nga igpapatubo aron motubo ang tibuok pan.

Mateo 13:33

Si Jesus nga naghisgot bahin sa usa ka sambingay mahitungod sa perlas.

Gisugilon usab ni Jesus ang usa ka istorya mahitungod sa tawo nga mipalit og perlas. Iyang nahibaloan nga matahom kaayo kini ug bililhon. Gipamaligya niya ang tanan nga iyang kabtangan aron iyang mapalit ang perlas. Gisugilon ni Jesus kini nga istorya aron itudlo nga ang mga panalangin sa ebanghelyo bililhon kaayo nga kita kinahanglan nga mohimo sa tanan nga atong mahimo aron madawat kini.

Mateo 13:45–46