Usa ka Sulat gikan ni Santiago––Usa ka pagdapit sa pagsunod, dili lamang sa pagdungog, sa pulong sa Dios

Santiago 1–3

Usa ka Sulat gikan ni Santiago

Usa ka pagdapit sa pagsunod, dili lamang sa pagdungog, sa pulong sa Dios

Si Santiago usa ka anak nga lalaki ni Maria ug usa sa mga igsoong lalaki ni Jesukristo. Usa usab ka lider si Santiago sa Simbahan sa Jerusalem. Naghimo siya og sulat ngadto sa mga tawo sa Dios sa tibuok kalibotan sa pagtabang kanila sa pagpuyo sa ebanghelyo ni Jesukristo.

Santiago 1:1

Misulat si Santiago, “Kon aduna man kaninyoy nakulangan og kaalam, papangayoa siya sa Dios.” Daghang katuigan ang nanglabay, usa ka batang lalaki nga ginganlan og Joseph Smith mibasa niini nga mga pulong ug mihukom sa pag-ampo mahitungod sa iyang mga pangutana. Sa kadugayan si Joseph Smith miingon, “Akong nahibaloan ang pagpamatuod ni Santiago tinuod.” Gitubag sa Dios ang pag-ampo ni Joseph, ug Siya motubag usab sa ato.

Santiago 1:5; Joseph Smith—Kasaysayan 1:11–17, 26

Si Jesus nagtudlo sa usa ka pundok sa mga tawo.

Misulat usab si Santiago nga kinahanglan kitang maminaw nga mabinantayon ngadto sa unsay isulti sa ubang mga tawo ug paningkamot nga dili masuko kanila. Kon kita masuko, dili kita makaserbisyo sa Dios.

Santiago 1:19–20

Usa ka batang lalaki ug batang babaye nakigsulti ngadto sa usa ka babaye nga may naghilak nga batang masuso.

Miingon si Santiago nga kini dili igo nga makadungog lamang sa pulong sa Dios; nagkinahanglan usab nga atongtumanon kini. “Tumana ninyo ang pulong, ug dili kay magpaminaw ra.”

Santiago 1:22

Ang batang lalaki ug ang batang babaye nagdapit sa babaye ug sa iyang masuso nga anak sa pagsulod sa usa ka madasigong tolda uban sa ilang pamilya.

Ingon nga usa ka sumusunod ni Jesukristo mas labaw kay sa magtuo lamang sa Dios, mipasabot si Santiago. Bisan ang yawa nakahibalo nga ang Dios tinuod. Kon kita makakita og mga tawo kinsa gitugnaw o gigutom, kinahanglan nga atong hatagan sila og panapot ug pagkaon. Kinahanglan nga kita moduaw sa mga balo ug sa mga walay ginikanan [ilo]. “Ang [hugot nga] pagtuo patay kon kini walay binuhatan,” misulat si Santiago.

Santiago 1:27; 2:14–20

Usa ka tawo naggiya og usa ka kabayo palayo gikan sa peligro.

Gusto usab ni Santiago nga tudloan ang mga Santos sa pagsulti sa maluluy-ong paagi ngadto sa mga tawo. Miingon siya nga ang pagmatngon sa atong mga pulong sama sa paggiya sa usa ka kabayo. Kita makagiya sa usa ka dako nga kabayo nga may rinda, nga gihigot sa usa ka gamay nga metal diha sa ba-ba sa kabayo. Ang atong mga pulong tingali ingon usab ka gamay, apan kini mahimong gamhanan.

Santiago 3:2–3

Usa ka sakayan nga gibagyo, gigiyahan sa usa ka gamay nga timon.

Miingon si Santiago nga ang pagpugong sa atong mga pulong sama sa paggiya sa usa ka sakayan. Bisan kon ang sakayan dako ug ang mga hangin kusog, kita makagiya sa sakayan pinaagi sa pagpugong sa usa ka gamay kaayo nga timon . Ang timon sama sa atong mga pulong. Kon kita makapugong unsay atong isulti, makahimo kita og usa ka dakong kalainan!

Santiago 3:4–5

Mga tawo nakiglalis sa usa ka sundalong Romano, kinsa nakatumba og pipila ka mga prutas.

Sakit nga mga pulong, mipasabot si Santiago, makapahimong sama sa usa ka gamay nga siga sa kalayo nga sinugdanan sa usa ka dakong kalayo. Kini mokatag og dali ug makahimo og usa ka daghang kasakit. Kini mao ang rason nganong importante ang magbantay sa atong mga pulong.

Santiago 3:5–6

Mga bata nagtanyag og prutas ngadto sa sundalo.

Misulat si Santiago nga kita naggamit sa atong mga ba-ba sa pag-ampo ngadto sa Langitnong Amahan. Apan usahay ato usab nga gigamit ang atong mga ba-ba sa pagsulti og ngil-ad ngadto sa ubang mga tawo, kinsa mga anak sa Langitnong Amahan. Miingon si Santiago kinahanglan dili ingon niana nga paagi.

Santiago 3:9–10

Usa ka malinawon nga talan-awon duol sa usa ka tuboran, uban ni Santiago nga nagtudlo sa mga tawo mahitungod sa ebanghelyo.

Sa pagtudlo sa mga Santos sa pagsulti og maluluy-ong mga pulong, gitudlo ni Santiago nga ang usa ka tuboran dili makahatag og dungan sa tab-ang nga tubig ug parat nga tubig. Ang kahoy nga igos dili makapamunga og mga oliba, ug ang usa ka paras dili makapamunga og mga igos. Sa samang paagi, kon kita adunay kaayo ug gugma diha sa atong mga kasingkasing, ang atong mga pulong kinahanglan nga maayo ug mahigugmaon usab!

Santiago 3:11–18