Siya Nabanhaw

Ang mga disipulo ni Jesus mibutang sa Iyang lawas diha sa lubnganan. Gusto pa unta sila nga moatiman sa Iyang lawas, apan hapit na ang Igpapahulay. Nagplano sila nga mobalik human sa Igpapahulay.

Lucas 23:52–56

Sayo sa buntag sa ikatulo nga adlaw human sa kamatayon ni Jesus, si Maria Magdalena ug ang uban miadto sa lubnganan.

Lucas 24:1; Juan 20:1

Sa dihang miabot sila, nakita nila nga ang bato nga gitabon sa lubnganan naligid na. Misulod sila sa lubnganan, ug ang lawas ni Jesus wala didto.

Lucas 24:2–3; Juan 20:1

Midagan si Maria aron sultihan si Pedro ug Juan nga adunay mikuha sa lawas ni Jesus. Si Pedro ug si Juan midagan padulong sa lubnganan.

Juan 20:2–4

Sa dihang miabot sila sa lubnganan, si Pedro ug si Juan misulod. Nakita nila nga ang lawas ni Jesus nawala. Ang sinina nga giputos Kaniya diha pa gihapon.

Juan 20:5–7

Si Pedro ug si Juan mipauli, apan si Maria nagpabilin sa lubnganan, naghilak. Mitan-aw siya sa lubnganan ug nakakita og duha ka anghel. Nangutana sila nganong naghilak siya. Miingon siya nga adunay tawo nga mikuha sa lawas ni Jesus, ug wala siya makahibalo asa kini.

Juan 20:11–13

Dayon miabot si Jesus, apan si Maria wala makaila nga Siya kadto. Nangutana si Jesus kaniya, “Babaye, nganong naghilak ka man?” Si Maria nagtuo nga Siya mao ang hardinero. Nangutana siya Kaniya kon nakahibalo ba Siya kon hain ang lawas ni Jesus.

Juan 20:14–15

Miingon si Jesus, “Maria.” Miatubang siya. Karon nasayod siya nga si Jesus kadto! Miingon siya ngadto Kaniya, “Magtutudlo.” Gisugo ni Jesus si Maria sa pagsulti sa ubang mga disipulo nga Siya kinahanglan nga moadto sa Iyang Langitnong Amahan. Nakita ni Maria ang ubang mga disipulo ug misulti kanila nga iyang nakita si Jesus ug Siya nabuhi pag-usab!

Juan 20:16–18

Nianang gabhiona, daghan sa Apostoles nagpundok. Gisirhan nila ang pultahan, nahadlok nga makit-an sila sa mga lider sa mga Judeo. Sa kalit, nakita nila si Jesus nga nagbarog taliwala kanila. Sa sinugdanan nahadlok sila. Nagtuo sila nga Siya usa ka espiritu. Miingon si Jesus, “Ang kalinaw mag-uban kaninyo.”

Lucas 24:33–38; Juan 20:19

Gidapit ni Jesus ang Apostoles sa paghikap sa Iyang mga kamot ug mga tiil. Gusto Siya nga masayod sila nga Siya adunay lawas, dili lang espiritu. Mikaon gani Siya og isda ug dugos uban kanila. Ang mga disipulo nalipay kaayo nga nakakita Kaniya!

Lucas 24:39–44; Juan 20:20

Dayon si Jesus mitabang sa Iyang Apostoles nga makasabot sa mga kasulatan nga nagtudlo mahitungod sa Iyang kamatayon ug Pagkabanhaw. Gusto Siya nga sila motudlo sa tanan nga tungod Kaniya, sila makahinulsol ug mapasaylo. Ang Apostoles mao ang Iyang mga saksi.

Lucas 24:44–48

Si Apostol Tomas wala diha sa dihang miabot si Jesus. Miingon siya nga dili siya motuo nga si Jesus buhi gawas kon siya makakita sa inagian sa lansang sa Iyang mga kamot.

Juan 20:24–25

Paglabay sa walo ka adlaw, ang mga disipulo nagpundok. Nagpakita pag-usab si Jesus. Niining higayona si Tomas anaa uban kanila.

Juan 20:26

Gidapit ni Jesus si Tomas sa paghikap sa mga samad sa Iyang mga kamot ug kilid. Gisultihan Niya si Tomas, “Tuo ug ayaw na pagduhaduha.” Miingon si Tomas, “Ginoo ko ug Dios ko!” Karon si Tomas mituo nga si Jesus nabanhaw. Miingon si Jesus nga ang mga tawo bulahan kon sila motuo, bisan kon sila wala makakita Kaniya.

Juan 20:27–29