Si Jesus Naghupay sa Duha ka Disipulo—Nagdungan sa pagpanglakaw diha sa dalan paingon sa Emaus

Lucas 24:13–25

Si Jesus Naghupay sa Duha ka Disipulo

Nagdungan sa pagpanglakaw diha sa dalan paingon sa Emaus

Duha sa disipulo ni Jesus nanglakaw paingon sa Emaus

Sa adlaw nga si Jesus nabanhaw, duha ka disipulo naglakaw gikan sa Jerusalem padulong sa usa ka lungsod nga gitawag og Emaus. Mga sumusunod sila ni Jesus, ug sila naguol. Nag-istoryahanay sila sa usag-usa mahitungod sa kamatayon ni Jesus ug sa ubang mga butang nga nahitabo sa miaging pipila ka adlaw.

Lucas 24:13–14

Nagpakita si Jesus ug nakig-uban sa paglakaw sa mga disipulo. Ang mga disipulo wala makaila nga si Jesus kadto.

Samtang sila naglakaw, miabot si Jesus ug midungan nila sa pagpanglakaw, apan wala sila makaila nga si Jesus kadto. Nangutana siya unsa ang ilang giistoryahan ug ngano nga naguol sila.

Lucas 24:15–17

Ang mga disipulo mipasabot nga si Jesus namatay.

Nasorpresa sila nga wala Siya makahibalo unsay nahitabo. Gisultihan nila Siya mahitungod ni Jesus. Nagtuo sila nga Siya mao ang ilang Manluluwas, apan Siya namatay.

Lucas 24:18–21

Miingon ang mga disipulo nga ang lawas ni Jesus nawala gikan sa lubnganan.

Miingon usab sila nga pipila ka babaye miadto sa Iyang lubnganan, apan ang lawas ni Jesus nawala. Ang mga anghel misulti sa mga babaye nga si Jesus buhi.

Lucas 24:21–24

Dayon si Jesus mitudlo kanila unsa ang gisulti sa mga kasulatan mahitungod sa Manluluwas. Miingon siya nga ang mga propeta mitudlo nga ang Manluluwas mamatay ug mabanhaw pag-usab.

Lucas 24:25–27

Gipanalanginan ni Jesus ang pan ug gihatag kini ngadto sa mga disipulo.

Sa dihang miabot sila sa Emaus, medyo gabii na. Ang duha ka disipulo midapit ni Jesus nga magpabilin uban kanila. Si Jesus milingkod aron mokaon uban nila. Mikuha siya og pan, mipanalangin niini, ug mihatag niini ngadto sa mga disipulo. Nianang higayona, nakahibalo sila nga si Jesus kadto. Sa kalit nawala Siya.

Lucas 24:29–31

Ang mga disipulo naghisgot sa ilang mga kasinatian uban ni Jesus.

Ang duha ka disipulo naghisgot kon unsa ang kainit nga ilang gibati sa ilang mga kasingkasing samtang si Jesus nagtudlo nila gikan sa mga kasulatan. Nagdali sila og balik ngadto sa Jerusalem aron sa pagsulti sa ubang disipulo nga ilang nakita si Jesus.

Lucas 24:32–35