Si Jesus Nagsugo sa Apostoles sa Pagpakaon sa Iyang mga Karnero—Magpakita og gugma alang ni Jesus pinaagi sa pagtudlo sa uban mahitungod Kaniya

Juan 21; Mateo 28:16–20; Marcos 16:15–19

Si Jesus Nagsugo sa Apostoles sa Pagpakaon sa Iyang mga Karnero

Magpakita og gugma alang ni Jesus pinaagi sa pagtudlo sa uban mahitungod Kaniya

Si Pedro ug ang ubang Apostoles nangisda.

Human mabanhaw si Jesus, si Pedro ug pipila sa ubang Apostoles nangisda. Bisan og nangisda sila sa tibuok gabii, wala silay nakuha.

Juan 21:1–3

Gipangutana ni Jesus ang Apostoles kon nakakuha ba sila og isda.

Pagkasunod buntag, ang Apostoles nakakita ni Jesus diha sa baybayon, apan wala sila makaila nga Siya kadto. Gipangutana Niya sila kon nakakuha ba sila og isda. Miingon sila nga wala.

Juan 21:4–5

Ang Apostoles naningkamot sa pagbira sa pukot nga puno sa isda ngadto sa ilang sakayan.

Gisultihan ni Jesus ang Apostoles sa pagtagak sa ilang pukot sa tuong bahin sa sakayan ug sila makakuha og isda. Ang Apostoles mibuhat unsay gisulti ni Jesus, ug labaw sa usa ka gatos nga isda ang mipuno sa pukot! Ang pukot bug-at kaayo sa mga isda nga ang Apostoles dili makabira niini ngadto sa sakayan.

Juan 21:6

Dayon nakaila si Juan kinsa kadto nga tawo. Gisultihan niya si Pedro, “Ang Ginoo kana.” Milukso si Pedro ngadto sa dagat ug milangoy paingon ni Jesus. Ang ubang Apostoles midala sa sakayan ug sa mga isda ngadto sa baybayon. Nagluto si Jesus og pipila ka pan ug isda, ug gidapit Niya ang Apostoles nga mokaon uban Niya.

Juan 21:7–13

Si Jesus nagsulti ni Pedro sa pagpakaon sa Iyang mga nating karnero.

Human sila makakaon, si Jesus nangutana ni Pedro, Simon, “Gihigugma mo ba ako labaw sa paghigugma nimo niining mga butanga?” Miingon si Pedro og oo. Dayon miingon si Jesus, “Atimana ang akong mga nating karnero.”

Juan 21:15

Si Pedro misulti ni Jesus nga siya nahigugma Kaniya.

Dayon si Jesus nangutana ni Pedro pag-usab kon siya nahigugma ba Kaniya. Pag-usab, miingon si Pedro og oo. Misulti si Jesus kaniya, “Atimana ang akong mga karnero.”

Juan 21:16

Nagtudlo si Jesus ni Pedro sa pag-atiman sa mga tawo nga nagsunod Kaniya.

Nangutana si Jesus ni Pedro sa ikatulong higayon kon siya nahigugma ba Kaniya. Miingon si Pedro, “Ginoo, nasayod ka sa tanan; nasayod ka nga gihigugma ko ikaw.” Misulti si Jesus kaniya pag-usab, “Atimana ang akong mga karnero.” Gusto ni Jesus nga atimanon ni Pedro ang mga tawo nga mosunod Kaniya.

Juan 21:17

Si Jesus misulti sa Apostoles sa pagpakigbahin sa ebanghelyo.

Unya, si Jesus misugo sa Iyang Apostoles sa pagpakigkita Niya sa usa ka bukid. Didto giingnan Niya sila sa pagpakigbahin sa Iyang ebanghelyo sa tibuok kalibotan, sa pagtudlo sa mga tawo sa Iyang mga sugo, ug pagbunyag sa tanan nga motuo. “Mahimo kamong mga saksi ngari kanako,” miingon Siya. Misaad siya nga Siya magauban kanila ug mohatag kanila og gahom pinaagi sa Espiritu Santo.

Mateo 28:16–20; Marcos 16:15–19; Mga Buhat 1:8

Dayon si Jesus mikayab ngadto sa langit sa usa ka panganod. Mibalik Siya ngadto sa Iyang Amahan sa Langit. Samtang ang Apostoles nagtan-aw Kaniya nga mibiya, duha ka anghel ang nagpakita. Miingon sila nga sama nga si Jesus miadto sa langit, Siya mobalik sa yuta sa samang paagi sa umaabot.

Mga Buhat 1:9–11