Usa ka Anghel Nagpagawas ni Pedro gikan sa Bilanggoan

Usa ka hari nga ginganlan og Herodes wala makagusto sa mga Kristiyanos. Gipapatay niya si Apostol Santiago. Dayon gipabilanggo niya si Pedro. Gibutangan niya og 16 ka sundalo aron sa pagbantay sa bilanggoan.

Mga Buhat 12:1–4

Sa dihang ang mga miyembro sa Simbahan nakadungog niini, sila miampo ug miampo ngadto sa Langitnong Amahan alang ni Pedro.

Mga Buhat 12:5

Usa ka gabii, si Pedro natulog. Gigapos siya og duha ka kadena tali sa duha ka sundalo.

Mga Buhat 12:6

Sa kalit, usa ka kahayag misidlak sulod sa bilanggoan, ug usa ka anghel mipakita. “Bumangon ka sa madali,” ang anghel miingon, ug ang mga kadena natangtang gikan sa mga kamot ni Pedro. Ang anghel misulti ni Pedro sa pagsunod kaniya.

Mga Buhat 12:7–8

Naghunahuna si Pedro nga siya nagdamgo. Misunod siya sa anghel labay sa mga bantay. Ang pultahang puthaw nga agianan padulong sa siyudad naabli og iya ra, ug si Pedro ug ang anghel migula pinaagi niini.

Mga Buhat 12:9–10

Mibiya ang anghel, ug nakaamgo si Pedro nga siya wala magdamgo. Nahibalo siya nga ang Ginoo mipadala sa anghel sa pagluwas kaniya.

Mga Buhat 12:10–11

Miadto si Pedro sa panimalay sa usa ka babaye nga ginganlan og Maria, diin daghang mga miyembro sa Simbahan mianha sa pag-ampo. Nanuktok siya sa pultahan.

Mga Buhat 12:12–13

Usa ka batang babaye nga ginganlan og Rode miduol sa pultahan. Sa dihang iyang nadunggan ang tingog ni Pedro, hilabihan niya sa kalipay! Midagan siya sa pagsulti sa uban.

Mga Buhat 12:13–14

Sa dihang gisultihan ni Rode ang tanan nga si Pedro anaa sa pultahan, wala sila motuo kaniya. Nagpadayon si Pedro sa pagtuktok.

Mga Buhat 12:15–16

Sa kataposan, giablihan nila ang pultahan ug nakita nga kini tinuod. Luwas si Pedro! Ang Ginoo mitubag sa ilang mga pag-ampo. Gisultihan ni Pedro ang tanan kon giunsa sa Ginoo pagdala kaniya pagawas sa bilanggoan.

Mga Buhat 12:16–17