Si Jesus Nagpili og Iyang mga Apostoles—Usa ka pagdapit nga mahimong “mananagat og mga tawo”

Mateo 10; Lucas 5:1–11; 6:12–16

Si Jesus Nagpili og Iyang mga Apostoles

Usa ka pagdapit nga mahimong “mananagat og mga tawo”

Si Jesus nga nagtudlo didto sa Dagat sa Galilea.

Usa ka adlaw, ang mga tawo nangadto sa Dagat sa Galilea aron maminaw ni Jesus nga magtudlo. Si Jesus mitudlo kanila gikan sa usa ka sakayan samtang naminaw sila didto sa baybayon. Ang sakayan gipanag-iya sa usa ka mananagat nga ginganlan og Simon.

Lucas 5:1–3

Dihang nahuman na si Jesus sa pagtudlo, gihangyo niya si Simon sa pagdala sa sakayan ngadto sa lawod nga bahin sa dagat. Giingnan niya si Simon nga ibutang ang iyang pukot ngadto sa tubig aron makakuha og pipila ka isda. Miingon si Simon nga namukot na siya sa tibuok gabii ug walay nakuha nga isda. Apan kay gihangyo man siya ni Jesus, iya na usab nga sulayan.

Lucas 5:4–5

Si Simon ug ang iyang mga higala nga nakakuha og daghang isda.

Nakakuha si Simon og labihan ka daghang isda nga nagisi ang iyang pukot! Gitawag niya ang iyang mga higala sa laing sakayan aron motabang niya. Sa wala madugay ang mga sakayan napuno sa isda, nagsugod sila sa pag-unlod. Si Simon ug ang iyang mga higala natingala!

Lucas 5:6–7, 9

Si Simon nga nagluhod sa atubangan ni Jesus.

Si Simon miluhod sa atubangan ni Jesus. Miingon siya, “Makasasala ako nga tawo, O Ginoo.” Nasayod siya nga si Jesus gipadala sa Dios. Giingnan siya ni Jesus nga ayaw kahadlok.

Lucas 5:8

Si Jesus nga nagdapit ni Simon, Andres, Santiago, ug Juan sa pagsunod Kaniya.

Si Jesus midapit ni Simon, sa iyang igsoon nga si Andres, ug sa iyang mga higala, si Santiago ug Juan sa pagsunod Kaniya. Imbes mangisda, motabang sila og mga tawo nga moadto kang Jesus.

Marcos 1:16–17; Lucas 5:10–11

Si Jesus nga naghatag sa Iyang mga Apostoles og awtoridad sa pagkapari sa pagpangulo sa Simbahan.

Si Simon, Santiago, ug Juan mibiya sa ilang sakayan nga pangisda ug nahimong mga Apostoles ni Jesus. Wala madugay, si Jesus mingalan ni Simon og Pedro. Ang Apostol usa ka espesyal nga saksi ni Jesukristo. Si Jesus mitawag og 12 ka lalaki nga mahimo nga Iyang mga Apostoles. Nag-ampo Siya aron masayod kinsa ang Iyang tawagon. Gihatagan Niya ang mga Apostoles og awtoridad sa pagkapari aron mangulo sa Iyang Simbahan.

Mateo 10; Lucas 6:12–16; 9:1–2

Usa ka Apostol nga nag-ayo sa usa ka bata.

Tungod kay ang mga Apostoles dunay gahom sa Dios, makaayo usab sila og mga tawo nga masakiton, mobuhi og tawo human nga sila mamatay, ug mohimo og ubang mga milagro.

Mateo 10:8

Si Jesus nga nagtudlo sa usa ka pundok sa mga tawo. Ang pipila ka tawo nasagmuyo sa Iyang mga gipangtudlo.

Gipadala ni Jesus ang Iyang mga Apostoles ngadto sa daghang siyudad sa pagtudlo og mga tawo sa Iyang ebanghelyo. Miingon Siya nga ang Espiritu Santo motabang nila nga mahibalo unsay isulti. Miingon si Jesus nga pipila ka tawo dili ganahan sa unsay ilang itudlo, apan kon sila magserbisyo nga matinud-anon, ang Dios magauban kanila.

Mateo 10:5–7, 19–22