Diha ni Kristo Ang Tanan Mangabuhi

Pipila sa mga miyembro sa Simbahan diha sa usa ka siyudad nga gitawag og Corinto may mga pangutana mahitungod sa unsay mahitabo human kita mamatay. Dili sila sigurado nga si Jesus sa tinuod nabanhaw ba gayod. Ang pipila sa mga tawo miingon nga walay pagkabanhaw. Nadungog ni Pablo ang mahitungod niini ug misulat og usa ka sulat ngadto sa mga Santos sa Corinto.

1 Mga Taga-Corinto 15:12–14

Misulat si Pablo nga ang Pagkabanhaw ni Jesukristo usa ka importanteng bahin sa Iyang ebanghelyo. “Namatay si Kristo alang sa atong mga sala,” miingon si Pablo, ug “siya mibangon pag-usab sa ikatulong adlaw.” Sobra sa 500 ka tawo ang nakakita Kaniya human sa Iyang Pagkabanhaw, lakip si Pablo ug ang ubang Apostoles.

1 Mga Taga-Corinto 15:1–8

Gitudlo ni Pablo nga kon si Kristo wala banhawa, tanan kita maguol ug walay paglaom. Tungod sa pagkapukan ni Adan, tanan kanato mamatay, apan tungod ni Jesukristo, tanan kita pagabanhawon usab!

1 Mga Taga-Corinto 15:17–22

Gipahinumdoman ni Pablo ang mga Santos sa Corinto nga ang mga tawo gipangbunyagan alang sa patay. Nganong kinahanglan natong buhaton kana kon ang mga tawo kinsa nangamatay dili na gayod mobangon pag-usab? Kita gibunyagan alang sa mga patay tungod kay kita nahibalo nga ang tanan mabuhi pag-usab. Kini naghatag kanila og higayon sa pagdawat sa mga panalangin sa Ginoo.

1 Mga Taga-Corinto 15:29

Pipila sa mga Santos sa Corinto nahibulong kon sama sa unsa ang atong mga lawas kon kita mabanhaw. Miingon si Pablo nga ang atong mga lawas mahimong mahimayaon. Kini dili huyang o magkasakit o matigulang. Ang pipila ka mga tawo adunay celestial nga mga lawas, hayag sama sa adlaw. Ang uban hayag sama sa bulan, ug ang uban mahimong hayag sama sa mga bitoon.

1 Mga Taga-Corinto 15:35, 40–43; Doktrina ug mga Pakigsaad 76:96–98; 88:20–23