Simon ug ang Gahom sa Dios

Usa ka lalaki nga ginganlan og Simon mipuyo sa Samaria. Sa dihang iyang nadungog ang ebanghelyo ni Jesukristo, siya mituo. Siya natingala usab sa mga milagro nga gibuhat sa mga disipulo ni Jesus uban sa gahom sa Dios. Gibunyagan si Simon, ingon man usab ang daghang uban nga mga lalaki ug mga babaye sa Samaria.

Mga Buhat 8:5–13

Ang Apostoles sa Jerusalem nakadungog nga ang mga tawo sa Samaria gipangbunyagan. Si Pedro ug si Juan miadto sa Samaria. Naggamit sa gahom sa Dios, sa pagkapari, ilang gipandong ang ilang mga kamot diha sa mga tawo kinsa nabunyagan ug mihatag kanila sa gasa sa Espiritu Santo.

Mga Buhat 8:14–17

Sa dihang nakita ni Simon si Pedro ug si Juan nga nagbuhat niini, mitanyag siya kanila og salapi ug miingon, “Hatagi usab ako niining gahuma.” Buot niya nga paliton ang pagkapari sa Dios aron siya makahatag usab sa gasa sa Espiritu Santo.

Mga Buhat 8:18–19

Gipasabot ni Pedro nga walay usa nga makapalit sa gahom sa dios. Usa kini ka gasa gikan Kaniya. Gisultihan ni Pedro si Simon nga gikinahanglan sa iyang kasingkasing ang kausaban. Gidapit niya si Simon sa paghinulsol ug sa pag-ampo ngadto sa Dios alang sa kapasayloan.

Mga Buhat 8:20–23

Naguol si Simon. Mihangyo siya ni Pedro sa pag-ampo alang kaniya sa pagtabang kaniya nga mausab.

Mga Buhat 8:24