Ang Sambingay sa mga Mamumuo sa Parasan

Si Jesus misugilon sa Iyang mga disipulo og usa ka sambingay aron matabangan sila nga mas makasabot unsay hulagway sa gingharian sa langit. Diha sa sambingay, ang usa ka tawo nagkinahanglan og mga tawo nga motrabaho sa iyang parasan [ubasan]. Mao nga, usa ka sayo sa buntag, nakakita siya og pipila ka trabahante nga miuyon nga motrabaho sa tibuok adlaw sa bayad nga usa ka denaryo. Nagsugod sila sa pagtrabaho.

Mateo 20:1–2

Tulo ka oras ang milabay, ang tawo nagsuhol og dugang pang mga trabahante. Iyang gihangyo sila nga motrabaho sa iyang ubasan sa tibuok adlaw. Misaad siya nga bayaran sila sa hustong suhol.

Mateo 20:3–4

Paglabay sa tulo ka oras human niana, ang tawo nakakita og daghan pang mga tawo nga nagkinahanglan og trabaho. Iya silang gihangyo nga motrabaho usab sa iyang ubasan.

Mateo 20:5

Sa kataposan, sa hapit na matapos ang adlaw, nakita sa tawo ang mga tawo nga walay buhatonon. Miingon sila nga walay mihatag kanila og bisan unsang buhaton sa tibuok adlaw. Ang tawo miingon nga mahimo ra silang motrabaho sa kataposang oras sa adlaw sa iyang ubasan.

Mateo 20:6–7

Sa pagtapos sa adlaw nga trabaho, ang tawo mibayad sa mga trabahate. Gihatagan niya og usa ka denaryo ang mga tawo nga nagtrabaho og usa ka oras. Gihatagan usab niya og usa ka denaryo ang matag usa sa ubang mga trabahante. Ang mga tawo nga nagtrabaho sa tibuok adlaw nangasuko. Nagtuo sila nga mas dako unta ang ilang madawat kay sa uban.

Mateo 20:8–12

Ang maong tawo mipahinumdom sa mga trabahante nga sila miuyon nga motrabaho sa tibuok adlaw alang sa usa ka denaryo. Miingon siya nga dili sila angay masuko kon mipili siya nga magmabination sa uban kinsa mitrabaho sa iyang ubasan.

Mateo 20:13–16