Mateo 16–17
Si Jesus Naghatag sa Iyang mga Apostoles og Mga Yawe sa Pagkapari
“Ibabaw niining bato pagatukoron ko ang akong simbahan”
Usa ka adlaw, nangutana si Jesus sa Iyang mga disipulo kon si kinsa Siya sa ilang hunahuna. Ang Iyang mga disipulo mitubag nga ang ubang mga tawo miingon nga Siya si Juan Bautista. Ang uban naghunahuna nga Siya usa ka propeta gikan sa Daang Tugon nga mibalik.
Mateo 16:13–14
Dayon si Jesus nangutana sa Iyang mga disipulo kon si kinsa Siya sa ilang hunahuna. Si Pedro miingon, “Ikaw mao ang Kristo, ang Anak sa Dios nga buhi.”
Mateo 16:15–16
Nalipay si Jesus nga nakadungog kang Pedro nga misulti niini. Giingnan niya si Pedro nga wala niya kini hikat-oni gikan sa ubang tawo kon si kinsa si Jesus. Ang Langitnong Amahan ang nagpadayag niini ngadto kaniya.
Mateo 16:17
Gisultihan ni Jesus si Pedro, “Ibabaw niini nga lig-on nga sukaranan Ako motukod sa akong simbahan.” Dayon misaad Siya nga ihatag kang Pedro ang mga yawe sa pagkapari, o awtoridad gikan sa Dios, aron siya ug ang ubang mga Apostoles makapangulo sa Iyang Simbahan dinhi sa yuta.
Mateo 16:18–19
Paglabay sa pipila ka adlaw, si Jesus midala ni Pedro, Santiago, ug Juan sa ibabaw sa bungtod aron sa pag-ampo.
Mateo 17:1; Lucas 9:28
Samtang nag-ampo si Jesus, ang Iyang nawong misanag sama sa adlaw. Bisan ang iyang sinina sanag nga tan-awon.
Mateo 17:2; Lucas 9:29
Duha ka propeta gikan sa Daang Tugon, si Moises ug Elias, mipakita. Nakigsulti sila ni Jesus mahitungod sa Iyang kamatayon ug Pagkabanhaw, nga mahitabo sa dili madugay sa Jerusalem. Si Pedro miingon kang Jesus, “Ginoo, maayo nga ania kita dinhi.”
Mateo 17:3–4; Lucas 9:30–33
Samtang namulong si Pedro, usa ka sanag nga panganod nagpalibot kanila. Nadungog nila ang tingog sa Dios nga nag-ingon, “Mao kini ang akong Anak nga pinalangga, nga kaniya may kalipay ako; paminawa ninyo siya.” Sila si Pedro, Santiago, ug si Juan nangahadlok ug nangatumba sa yuta.
Mateo 17:5–6
Gihikap ni Jesus ang Iyang mga Apostoles ug miingon, “Tindog kamo, ug ayaw kahadlok.” Sa paghangad nila. Wala na sila si Moises ug si Elias. Niini nga bungtod, si Pedro, Santiago, ug Juan nakadawat sa mga yawe sa pagkapari nga gisaad ni Jesus kanila.
Mateo 17:7–9; tan-awa usab sa Doktrina ug mga Pakigsaad 27:12–13