Si Jesus didto sa Linaw sa Betsata

Nag-ayo sa tawo nga dugay nang masakiton

Mga tawo nga nagpundok sa Linaw sa Betsata.

Didto sa Jerusalem, dunay usa ka dapit nga gitawag og Linaw sa Betsata. Nagtuo ang mga tawo nga kini nga linaw dunay makaayo nga mga gahom. Daghang tawo nga masakiton, buta, o dili makalakaw moadto niini nga linaw.

Juan 5:2–3

Mga tawo nga motuslob sa tubig aron mamaayo.

Ang mga tawo mituo nga, sa piho nga panahon, usa ka anghel mokanaog ug mokutaw sa tubig sa mao nga linaw. Ang unang tawo nga makatuslob sa tubig human nga kini kutawon mamaayo sa bisan unsay iyang sakit. Daghang tawo ang misulay nga mag-una ngadto sa linaw.

Juan 5:4

Usa ka tawong masakiton nga naghigda duol sa linaw.

Usa sa mga tawo nga didto sa linaw mao ang tawo nga dili makalakaw. Masakiton siya sulod na sa 38 ka tuig. Gusto siyang motuslob ngadto sa linaw aron mamaayo, apan sa matag higayon nga siya mosulay, adunay laing tawo nga makauna.

Juan 5:5–7

Namatikdan ni Jesus ang tawo nga masakiton.

Usa ka Adlaw nga Igpapahulay, naa didto si Jesus sa Jerusalem. Samtang naglakaw Siya sa siyudad, naabot Siya sa Linaw sa Betsata ug nakita ang tawo nga naghigda didto.

Juan 5:6

Gipangutana ni Jesus ang tawo kon gusto ba siyang maayo.

Nasayod si Jesus nga ang tawo nasakit sulod na sa dugay kaayong panahon ug dili makalakaw. Gipangutana siya ni Jesus kon gusto ba siya nga maayo.

Juan 5:6

Ang tawo miingon kang Jesus nga walay tawo nga makatabang kaniya.

Ang tawo miingon kang Jesus nga walay tawo nga makatabang niya nga makatuslob sa linaw, ug kon ang tubig makutaw, ang uban kanunay nga mag-una kaniya.

Juan 5:7

Si Jesus miingon sa tawo, “Tindog, dad-a ang imong gihigdaan ug lakaw.” Diha dayon, naayo ang tawo! Mibarog dayon siya ug gipunit ang iyang gihigdaan. Sa unang higayon sulod sa 38 ka tuig, makalakaw na siya!

Juan 5:8–9

Ang mga lider nangutana sa tawo nganong nagtrabaho siya sa adlawng Igpapahulay.

Ang mga lider sa mga Judeo nakakita sa tawo nga nagpas-an sa iyang higdaanan. Miingon sila nga wala siya magtahod sa adlawng Igpapahulay, kay nagtuo sila nga ang pagpas-an sa iyang higdaanan susama og nagtrabaho. Ang tawo mipasabot nga bag-o lang siyang naayo, ug ang tawo nga miayo kaniya misulti kaniya sa pagdala sa iyang gihigdaan.

Juan 5:10–11

Mga lider nga nasuko kang Jesus sa pagpang-ayo atol sa Igpapahulay.

Nahibaloan sa mga lider nga si Jesus ang miayo sa tawo ug misulti kaniya sa pagdala sa iyang gihigdaan atol sa Igpapahulay. Nasuko sila kang Jesus ug gustong mopatay Kaniya. Si Jesus miingon nga nagbuhat lamang Siya sa mga butang nga gitudlo Kaniya sa Amahan sa Langit nga buhaton.

Juan 5:15–17