Si Jesus Miayo sa usa ka Babaye ug Mibuhi og Balik sa Anak ni Jairo nga Babaye

Usa ka tawo nga ginganlan og Jairo nga nagpuyo kauban sa iyang asawa ug anak nga babaye sa usa ka lungsod duol sa Dagat sa Galilea. Si Jairo usa ka lider sa sinagoga, diin ang mga Judeo nangadto sa pagsimba sa Dios.

Marcos 5:22

Ang anak ni Jairo nga babaye, nga 12 anyos pa lamang, grabe nga nasakit. Hapit na siyang mamatay. Nasayod si Jairo nga nagkinahanglan siya og tabang. Nasayod usab siya nga si Jesus anaa sa ilang lungsod.

Marcos 5:22–23

Mibiya si Jairo sa iyang panimalay ug nakita si Jesus. Miluhod siya sa tiilan ni Jesus ug mihangyo Kaniya nga moadto aron ayohon ang iyang anak nga babaye. Nasayod si Jairo nga kon mapanalanginan ni Jesus ang iyang anak nga babaye, mabuhi siya. Si Jesus misunod ni Jairo ngadto sa iyang balay. Panon sa katawhan ang misunod Kaniya.

Marcos 5:23–24

Usa ka babaye sa mao gihapon nga lungsod nagkinahanglan usab sa tabang ni Jesus. Grabe ang iyang sakit sulod sa 12 na ka tuig. Nagasto na niya ang tanan niyang kwarta para sa mga doktor, apan walay usa nga nakaayo kaniya—mas migrabe pa siya. Nasayod siya nga si Jesus makaayo kaniya. Apan unsaon niya pagduol Kaniya taliwala sa katawhan?

Marcos 5:25–27

Ang babaye mituo nga bisan kon makahikap lang siya sa mga sapot ni Jesus, mamaayo siya. Gikab-ot niya si Jesus dihang Siya miagi. Dihang nahikap niya ang sidsid sa Iyang mga kupo, ang iyang sakit naayo.

Mateo 9:20; Marcos 5:27–29; Lucas 8:44

Diha dayon, si Jesus mihunong sa paglakaw. Mibati Siya nga dunay gahom nga migawas gikan Kaniya. “Kinsa ang mihikap kanako?” Siya nangutana. Naglibog ang iyang mga disipulo. Daghang tawo ang mihikap Kaniya—gilibotan sila sa mga tawo. Gianinaw ni Jesus ang palibot sa pagsusi kon si kinsa ang mihikap Kaniya.

Marcos 5:30–32; Lucas 8:45

Nakita ni Jesus ang babaye nga mihikap sa Iyang mga sapot. Gisultihan niya si Jesus mahitungod sa iyang sakit, ug si Jesus miayo kaniya. Giingnan siya ni Jesus nga magmalinawon. Naayo siya tungod sa iyang pagtuo Kaniya. “Pagmalinawon,” Siya miingon kaniya.

Marcos 5:33–34; Lucas 8:47–48

Dayon usa ka lalaki miabot gikan sa balay ni Jairo. Miingon siya nga ulahi na kaayo: Patay na ang anak ni Jairo. Dili na angay nga samokon pa ni Jairo si Jesus.

Marcos 5:35

Diha dayon nga nadungog kini ni Jesus, giingnan Niya si Jairo, “Ayaw kahadlok, salig lang.” Dayon nangadto sila sa balay ni Jairo.

Marcos 5:36–38

Si Jairo ug ang iyang asawa midala ni Jesus diin ang ilang anak nga babaye naghigda. Gikuptan ni Jesus ang kamot sa bata ug giingnan, “Bangon.”

Marcos 5:41

Diha dayon, ang anak ni Jairo nga babaye mibangon gikan sa iyang gihigdaan. Dili na siya patay! Si Jesus mihangyo kang Jairo ug sa iyang asawa sa paghatag kaniya og makaon. Nahingangha sila sa unsay nahimo ni Jesus sa ilang anak nga babaye. Iyang gihangyo sila nga dili isugilon ngadto sa ubang tawo ang mahitungod niini nga milagro.

Marcos 5:42–43